Avropada ən çox vergi tətbiq edən ölkələr hansılardır? – Siyahı

Avropa ölkələri vergilərin sayına görə ciddi şəkildə fərqlənir.
Yeniavaz.com “Tax Policy Associates” tərəfindən açıqlanan məlumatlara istinadən xəbər verir ki, Avropada ən çox vergi tətbiq edən ölkə Fransadır.
Fransada vergilərin sayı 348-ə çatır. Bu göstərici ikinci sırada qərarlaşan Danimarkadakı vergilərin sayından iki dəfədən çoxdur. Avropa üzrə orta göstərici isə təxminən 90 vergi təşkil edir.
Fransada tətbiq olunan 348 verginin 243-ü aşağı gəlirli vergilər kateqoriyasına daxildir. Bu vergilər ayrı-ayrılıqda nisbətən az gəlir gətirsə də, onların çoxluğu ölkənin vergi sistemini daha mürəkkəb edir.
Qeyd olunur ki, vergilərin sayının çox olması avtomatik olaraq həmin ölkədə insanların daha çox vergi ödəməsi demək deyil. Bu göstərici əsasən vergi sistemlərinin quruluşunu və mürəkkəbliyini müqayisə etmək üçün istifadə olunur.
Reytinqdə ikinci yerdə Danimarka (132 vergi), üçüncü yerdə isə Avstriya (117 vergi) qərarlaşıb. Polşada 115, Belçikada 112, Portuqaliyada 110, Rumıniyada isə 109 fərdi vergi mövcuddur.
Avropada vergilərin sayının ən aşağı olduğu ölkələr isə Baltikyanı dövlətlərdir. Estoniyada 34, Litvada 35, Latviyada isə 54 fərdi vergi tətbiq olunur.
Estoniya 34 vergi ilə siyahıda sonuncu yerdədir. Ölkənin nisbətən sadə vergi sistemi onun beynəlxalq vergi rəqabətliliyi baxımından yüksək qiymətləndirilməsinin əsas səbəblərindən biri hesab olunur.
Almaniya da diqqətçəkən nümunələrdəndir. Avropanın ən böyük iqtisadiyyatına malik olan Almaniyada vergilərin sayı cəmi 60-dır. Bu göstərici Fransadakı vergilərin sayından beş dəfədən çox azdır.
Mütəxəssislər Almaniyanın vergi sisteminin daha yığcam olmasını ölkədə müxtəlif dövrlərdə həyata keçirilmiş vergi islahatları və federal strukturla əlaqələndirirlər.
Avropa ölkələrində vergilərin sayı aşağıdakı kimi olub:
Fransa – 348
Danimarka – 132
Avstriya – 117
Polşa – 115
Belçika – 112
Portuqaliya – 110
Rumıniya – 109
İsveçrə – 98
Macarıstan – 93
Birləşmiş Krallıq – 90
Norveç – 89
Lüksemburq – 89
İtaliya – 89
İspaniya – 88
Çexiya – 88
Xorvatiya – 86
Sloveniya – 81
Kipr – 81
İsveç – 74
Niderland – 74
Yunanıstan – 72
Slovakiya – 69
Bolqarıstan – 69
Malta – 67
Finlandiya – 62
İslandiya – 61
İrlandiya – 61
Almaniya – 60
Latviya – 54
Litva – 35
Estoniya – 34

Elnur Əli