Ermənistan və İran iki ölkə sərhədində sadələşdirilmiş “yaşıl” gömrük dəhlizi tətbiq etmək barədə razılığa gəliblər.
Yeniavaz.com “Sputnik Ermənistan”a istinadla xəbər verir ki, razılaşma Culfada İran iqtisadiyyat nazirinin müavini və İran Gömrük Xidmətinin rəhbəri Fərud Əsgəri ilə Ermənistan Dövlət Gəlirləri Komitəsinin sədri Eduard Akopyan arasında keçirilən görüşdə əldə edilib.
Tərəflər sadələşdirilmiş “yaşıl” gömrük dəhlizinin yaradılması barədə protokol imzalayıblar.
Tədbirlər Ermənistan-İran sərhədindən malların keçidini sürətləndirmək və daşıyıcılar üçün inzibati prosedurları azaltmaq məqsədi daşıyır.
Məlumata görə, yeni mexanizmin Norduz-Meğri sərhəd-keçid məntəqəsində tətbiqi planlaşdırılır. Yeni mexanizmin təfərrüatları və onun işə salınması üçün tələblər ekspert səviyyəsində razılaşdırılmalıdır.
İran mediasının məlumatına görə, tərəflər ilkin yük məlumatlarının elektron mübadiləsini genişləndirmək niyyətindədirlər. Gömrük orqanları yük maşınları sərhədə çatmazdan əvvəl lazımi məlumatları alacaq və bu da daha sürətli rəsmiləşdirməyə imkan verəcək.
Həmçinin kağız sənədlərdən tədricən rəqəmsal sənədlərə keçmək və onların yoxlanılmasını sadələşdirmək planlaşdırılır. Bu, yüklərin Ermənistan və İran arasındakı əsas quru keçidlərindən birindən keçmə müddətini azaltmalıdır.
Tərəflər gömrük əməkdaşlığının inkişaf etdirilməsi üçün digər tədbirlər barədə də razılığa gəliblər. Bunlara səlahiyyətli iqtisadi operatorların (AEO) qarşılıqlı tanınması, gömrük məlumatlarının elektron mübadiləsi (EDI) və tək kommersiya fakturası ilə hərəkət edən birdən çox yük maşınının sadələşdirilmiş rəsmiləşdirilməsi daxildir.
Tətbiqimizi yükləyə bilərsiniz
