Yəməndə İranla müttəfiq olan husilər ölkənin Qırmızı dəniz sahilində yerləşən strateji Moça liman şəhərinə nəzarəti ələ keçirib.
Yeniavaz.com “Reuters”ə istinadən xəbər verir ki, husilər Moçanı ələ keçirdikdən sonra Qırmızı dənizdə yerləşən Haniş adalarına doğru da irəliləyiblər. Bu addım dünyanın ən mühüm dəniz yollarından biri hesab olunan Bab əl-Məndəb boğazı ilə bağlı narahatlıqları artırıb.
Məlumata görə, Yəmən hökumətinin qüvvələri isə Qırmızı dəniz sahili boyunca cənuba doğru hərəkət edərək Bab əl-Məndəb boğazı yaxınlığındakı Dhubab bölgəsinə çatmağa çalışır. Dhubab və yaxınlıqdakı Perim adasına nəzarət boğaz üzərində mövqe baxımından mühüm əhəmiyyət daşıyır.
Bab əl-Məndəb boğazı Qırmızı dənizi Ədən körfəzi ilə birləşdirir və Asiya ilə Avropa arasındakı mühüm ticarət marşrutunun üzərində yerləşir.
“Reuters”in məlumatına görə, dünya neft ixracının təxminən 7 faizi bu boğazdan keçir.
Husilərin boğaz üzərində təsirini artırması xüsusilə Səudiyyə Ərəbistanının neft ixracı üçün risk yaradır. Ölkə Hörmüz boğazında nəqliyyatın kəskin azalmasından sonra neftinin bir hissəsini Qırmızı dənizdəki Yanbu limanı vasitəsilə ixrac edir.
Husilərin nəzarətində olan Humanitar Əməliyyatların Koordinasiya Mərkəzi Qırmızı dənizdə naviqasiyanın Səudiyyə Ərəbistanı gəmiləri istisna olmaqla, digər gəmiçilik şirkətləri üçün təhlükəsiz olduğunu açıqlayıb.
BMT-nin Yəmən üzrə xüsusi nümayəndəsi Hans Qrundberq isə vəziyyətin 2022-ci ildə əldə olunan atəşkəsdən sonra ölkənin genişmiqyaslı müharibəyə qayıtması baxımından ciddi risk yaratdığını bildirib.
Bu hadisələr ABŞ-İran qarşıdurmasının fonunda baş verir. İranın husilərə silah və hərbi məsləhətlərlə dəstək verdiyi bildirilir. Tehran isə husilərə birbaşa nəzarət etdiyini rədd edir.
Husilərin Moçanı ələ keçirməsindən sonra neft bazarında da ciddi dalğalanma müşahidə olunub.
Tətbiqimizi yükləyə bilərsiniz
