Yoğurdun ürək sağlamlığı üçün faydalı ola biləcəyi müəyyənləşib.
Yeniavaz.com xəbər verir ki, “The Journal of Nutrition, Health and Aging” jurnalında dərc olunan araşdırmada yoğurdun yaşlanma dövründə sağlam qidalanmadakı rolu araşdırılıb.
Araşdırmalara görə, probiotik yoğurd xolesterinin səviyyəsini aşağı sala bilər. Xüsusilə “pis” xolesterin kimi tanınan LDL xolesterinin azalmasına kömək edə bilər.
ABŞ-də aparılan geniş araşdırmada həftədə ən azı 5 dəfə yoğurd yeyən insanlarda yüksək qan təzyiqi riskinin 16 faiz daha aşağı olduğu müəyyən edilib.
Digər bir araşdırmada isə yoğurd istehlakının ürək-damar xəstəlikləri riskinin azalması ilə əlaqəli olduğu üzə çıxıb.
Danimarkada aparılan araşdırma da maraqlı nəticə göstərib. Tam yağlı südün tam yağlı yoğurdla əvəzlənməsi ürək xəstəlikləri riskinin 11-13 faiz azalması ilə əlaqələndirilib.
Alimlər bildirirlər ki, yoğurdun tərkibində doymuş yağların olması onun mütləq zərərli olduğu anlamına gəlmir. Məhsulun tərkibindəki digər qida maddələri və faydalı bakteriyalar da orqanizmə təsir göstərə bilər.
Bununla belə, mütəxəssislər qeyd edirlər ki, mövcud araşdırmaların bir hissəsi yalnız əlaqəni göstərir. Yoğurdun birbaşa xəstəlik riskini azaltdığı hələ tam sübut edilməyib.
Alimlər təbii yoğurdun meyvə və tam taxıllı məhsullarla birlikdə qəbul edilməsini tövsiyə edirlər. Şəkəri yüksək olan yoğurdların isə seçilməsində diqqətli olmaq lazımdır.
Araşdırmaçılar gələcəkdə müxtəlif yoğurt növlərinin və onların tərkibindəki bakteriyaların orqanizmə təsirini daha ətraflı öyrənməyi planlaşdırırlar.
Tətbiqimizi yükləyə bilərsiniz
