Trampın reytinqi rekord həddə düşdü

ABŞ Prezidenti Donald Trampın fəaliyyətinə ictimai dəstək rekord səviyyədə aşağı düşüb.
Yeniavaz.com xəbər verir ki, bu barədə “Financial Times” və “Focaldata” araşdırma şirkətinin keçirdiyi milli sorğunun nəticələrində bildirilir.
Sorğuda iştirak edən qeydiyyatdan keçmiş seçicilərin yalnız 33%-i Trampın fəaliyyətini bəyəndiyini bildirib. Bu göstərici son bir ayda 3 faiz bəndi azalıb və “Financial Times”ın sorğular keçirməyə başladığı vaxtdan bəri ən aşağı nəticədir.
Trampın Respublikaçılar Partiyasındakı dəstəyi də rekord səviyyəyə enib. Respublikaçı seçicilərin 72%-i prezidentin fəaliyyətini bəyəndiyini bildirib. Bu göstərici bir ay ərzində 2 faiz bəndindən çox azalıb.
Sorğunun nəticələrinə görə, Trampa dəstəyin azalmasının əsas səbəblərindən biri iqtisadi vəziyyət və yaşayış xərclərinin artmasıdır. Respondentlərin təxminən üçdə ikisi ABŞ iqtisadiyyatının yanlış istiqamətdə getdiyini düşünür. 57% isə Trampın prezidentliyi dövründə maliyyə vəziyyətlərinin pisləşdiyini bildirib.
Respublikaçılar arasında Trampın iqtisadiyyat və iş yerləri ilə bağlı fəaliyyətinə müsbət münasibət də kəskin azalıb. Bu göstərici bir ay ərzində təxminən 8 faiz bəndi azalaraq 53%-ə düşüb.
Prezidentin ticarət siyasəti də seçicilərin əksəriyyətinin narazılığına səbəb olub. Respondentlərin 56%-i Kanadadan gətirilən təxminən 20 milyard dollar dəyərində mallara 50%-lik tarif tətbiq edilməsini dəstəkləmədiyini bildirib.
Sorğunun nəticələri noyabrda keçiriləcək Konqresə aralıq seçkilərində Respublikaçılar üçün də ciddi risklərə işarə edir. Seçicilərin 46%-i Trampın Respublikaçılar Partiyasının namizədlərinin qələbə şanslarını azaltdığını düşünür.
Müstəqil seçicilərin 47%-i isə Trampın hər hansı Respublikaçı namizədi dəstəkləməsinin həmin namizədə səs vermək ehtimallarını azaltdığını bildirib.
Bu fonda Demokratlar seçici dəstəyində üstünlüyünü artırıb. Qeydiyyatdan keçmiş seçicilər arasında Demokratlar Partiyasına səs vermək niyyəti 7,5 faiz bəndi öndədir. Bir ay əvvəl bu fərq 5 faiz bəndi təşkil edib.
Qeyd edək ki, “Focaldata” sorğusu 28 avqust – 1 sentyabr tarixlərində 1 914 qeydiyyatdan keçmiş seçici arasında keçirilib. Sorğunun səhv payı 2,6 faiz təşkil edir.