Ermənistanda Rusiyayönlü qüvvələrə qarşı repressiyalar artır – Zaxarova

Ermənistanda Rusiya ilə müttəfiq münasibətlərin qorunması və inkişaf etdirilməsinin tərəfdarı olan siyasi qüvvə və şəxslərə qarşı təzyiqlər artır.
Yeniavaz.com xəbər verir ki, bunu Rusiya Xarici İşlər Nazirliyinin sözçüsü Mariya Zaxarova brifinq zamanı bildirib.
Zaxarovanın sözlərinə görə, Moskva Ermənistanın daxili işlərinə və hüquq-mühafizə orqanlarının fəaliyyətinə müdaxilə etmir. Bununla belə, Rusiya Ermənistanı əsrlər boyu formalaşmış xüsusi münasibətlərə malik qardaş ölkə hesab edir və ölkədə baş verən siyasi proseslərə biganə qala bilməz.
“Rusiya Prezidenti Vladimir Putinin aprelin 1-də Moskvada Ermənistanın Baş naziri Nikol Paşinyanla görüşündə vurğuladığı mənfi tendensiya təəssüf ki, davam edir”, – Zaxarova deyib.
Diplomat Ermənistanda Rusiya ilə müttəfiq münasibətlərin qorunması və möhkəmləndirilməsinin tərəfdarı olan siyasi qüvvələrə və şəxslərə qarşı “əsl repressiyaların” artdığını iddia edib.
Onun sözlərinə görə, bu proses Ermənistan cəmiyyətinin ikitərəfli əlaqələrin inkişaf etdirilməsi tələbi ilə ziddiyyət təşkil edir. Zaxarova təhlükəsizlik qüvvələrinin fəaliyyətinin siyasi xarakter daşıdığını da bildirib.
Rusiya XİN sözçüsü Ermənistan hakimiyyətinin bu siyasətinin rəsmi Yerevanın Moskva ilə münasibətləri pisləşdirmək niyyətində olmadığı barədə verdiyi vədlərlə ziddiyyət təşkil etdiyini vurğulayıb.
“Biz gözləyirik ki, Ermənistanda ənənəvi ikitərəfli əməkdaşlığın gücləndirilməsi üçün çalışan siyasi partiyalar və bloklar, bələdiyyə liderləri, ictimai xadimlər və fəallar ölkənin daxili siyasi həyatında inamla iştirak edə və onun inkişafına və çiçəklənməsinə töhfə verə biləcəklər”, – Zaxarova qeyd edib.
O, həmçinin Rusiya ilə konstruktiv münasibətlərin tərəfdarı olan siyasətçi və ictimai xadimlərə qarşı təzyiqlərin Avropa İttifaqının Ermənistanla bağlı siyasətini də gündəmə gətirdiyini bildirib.
Zaxarovanın fikrincə, Ermənistanın yeni “dostları” ölkənin Rusiya ilə qarşıdurmasına xidmət edən proseslərə göz yumur və bu qarşıdurmada Ermənistanın potensialından və vətəndaşlarından istifadə olunur.