ABŞ-nin dövlət borcu rekord həddə çatdı

ABŞ-nin dövlət borcu 2017-ci ildən bəri 20 trilyon dollardan çox artararq, rekord həddə - 40 trilyon dollara yüksəlib.
Yeniavaz.com xəbər verir ki, bu barədə ABŞ Maliyyə Nazirliyi məlumat yayıb.
Məlumata görə, çərşənbə günü dövlət borcu 40 trilyon dolları keçib və on ildən az müddətdə ikiqat artıb.
Borcun kəskin şəkildə artmasına səbəb dövlət xərclərinin gəlirləri üstələməsi və ABŞ-ni büdcə kəsirini ödəmək üçün daha çox borc almağa məcbur etməsidir.
“26 ildir ki, kəsir içindəyik. Bu günə qədər büdcəmizdə mövcud olan bir çox struktur problemlərini nəzərə almamışıq. Bu isə hər hansı bir borc problemində olduğu kimi sürətlənərək vəziyyətin daha da pisləşməsinə səbəb olub”, - deyə Peterson Beynəlxalq İqtisadiyyat İnstitutunun rəhbəri Maykl Peterson “CBS News” telekanalına verdiyi müsahibədə bildirib.
Federal hökumət borc almağa davam etdikcə, faiz ödənişləri dövlət xərclərinin getdikcə artan payına çevrilib və bu da borcun daha da böyüməsinə səbəb olub. Hazırda ABŞ hökuməti milli müdafiə və ya tibbi sığortadan çox borc xidmətinə daha çox pul xərcləyir. Analitiklər hesab edirlər ki, dövlət borcunun artımının yavaşlaması ehtimalı azdır.
“Təəssüf ki, biz səhv istiqamətdə gedirik”, - deyə ABŞ İqtisadi və Siyasət Tədqiqatları Mərkəzinin həmtəsisçisi Din Beyker qeyd edib.
O, hərbi xərclərin artmasına diqqət çəkib və bunun büdcə yükünü daha da artırdığını bildirib.
Peterson İnstitutunun hesablamalarına görə, ölkə xərclər və ya vergi islahatları həyata keçirməsə, dövlət borcu altı il ərzində 50 trilyon dollara çata bilər.