“Sen-Trope Epşteyn şəbəkəsi üçün əsas mərkəz idi” − “Le Monde”

“Amerikalı maliyyəçi Ceffri Epşteyn Fransanın Sen-Trope kurortundan cinsi istismar üçün qızları əsas cəlb etmə yerlərindən biri kimi istifadə edib”.
Yeniavaz.com xəbər verir ki, bu barədə Fransanın “Le Monde” qəzeti məhkəmə sənədlərinə və şahid ifadələrinə istinadən məlumat yayıb.
Qəzetin məlumatına görə, Epşteyn demək olar ki, hər il kurortu ziyarət edirdi:
“Bura onun Parisdən sonra Fransada ikinci sevimli yeri idi. Hər iki məkan Epşteyn və onun əlbirləri tərəfindən cinsi cinayətlər törətmək üçün istifadə olunurdu”.
Qəzet qeyd edir ki, Epşteynin Fransadakı əsas cəlbedicilərindən biri model agenti Jan-Luk Brunel idi və o, öz işindən Epşteynə gənc qızlarla tanış olmaq imkanı yaratmaq üçün istifadə edirdi.
Xatırladaq ki, Epşteyn 6 iyul 2019-cu ildə Nyu-York ştatının hüquq-mühafizə orqanları tərəfindən həbs edilib. Prokurorlar bildiriblər ki, 2002-2005-ci illər arasında onun Manhettendəki evinə onlarla yetkinlik yaşına çatmayan qızın (ən kiçiyinin 14 yaşı olub) səfərlər təşkil etdiyinə dair dəlilləri var. Epşteynin dost və tanışları arasında təkcə ABŞ-dən deyil, həm də bir çox başqa ölkələrdən (keçmiş dövlət başçıları da daxil olmaqla) çoxsaylı hazırkı və təqaüdə çıxmış vəzifəli şəxslər, tanınmış sahibkarlar və şou-biznes məşhurları var idi. Maliyyəçinin vətənində cinayət təqibi 2019-cu ilin avqust ayında həbsxana kamerasında intihar etməsindən sonra dayandırıldı.