Yer kürəsində hər kəs eyni vaxtda tullansa, nə baş verər? – Fizik açıqladı

Əgər Yer kürəsindəki hər kəs eyni vaxtda tullansa, planet faktiki olaraq yerindən tərpənməz.
Yeniavaz.com xəbər verir ki, bu barədə Cənub-Şərqi Luiziana Universitetinin fiziki Rett Allen UNILAD nəşrinə müsahibəsində bildirib.
O, bu hipotetik ssenarini izah etmək üçün impuls və enerjinin qorunması qanunlarından istifadə edib.
Alim öz qiymətləndirməsində Yer kürəsində təxminən yeddi milyard insanın olduğunu və onların hər birinin təxminən 30 santimetrə qədər tullana biləcəyini fərz edib.
O, hətta hər kəsin eyni vaxtda tullanacağı halda belə, bunun planetə təsirinin əhəmiyyətsiz olacağını bildirib.
Fizik Yer kürəsinin kütləsinin təxminən 6 x 10²⁴ kiloqram olduğunu, buna görə də, insanların eyni vaxtda tullanmasından yaranan ümumi impulsun planetin hərəkətinə demək olar ki, heç bir təsir göstərməyəcəyini qeyd edib.
Allenin hesablamalarına görə, Yer sadəcə olaraq əks istiqamətdə qısamüddətli (saniyədə cəmi 2,6 x 10⁻¹³ metr) sürətlənmə yaşayacaq və bir saniyədə planet hidrogen atomunun radiusunun təxminən yüzdə biri qədər yer dəyişəcək. Bu isə praktiki olaraq ölçülməsi mümkün olmayan bir göstəricidir.
Alim qeyd edib ki, insanlar yerə düşdükdən sonra isə Yer öz əvvəlki vəziyyətinə qayıdacaq.
Fizikin fikrincə, bu prosesi yayla birləşdirilmiş müxtəlif kütləli iki cisimlə müqayisə etmək olar. Bu halda daha yüngül cisim daha çox, daha ağır cisim isə daha az hərəkət edir. Yer kürəsi və insanlar məsələsində isə bu yay rolunu cazibə qüvvəsi oynayır.