Dünyanın ən böyük qəhvə istehsalçıları açıqlandı – Siyahı

Dünyada yaşıl qəhvə (qovrulmamış qəhvə dənələri) istehsalında Braziliya liderliyini qoruyub.
Yeniavaz.com xəbər verir ki, ABŞ Kənd Təsərrüfatı Nazirliyinin Xarici Kənd Təsərrüfatı Xidmətinin (USDA FAS) məlumatına görə, ölkə 63 milyon 60 kiloqramlıq kisə qəhvə istehsal edərək qlobal istehsalın 35 faizini təmin edib.
Məlumata əsasən, Braziliyanın istehsal həcmi Vyetnam, Kolumbiya və İndoneziyanın birlikdə istehsal etdiyi 56,6 milyon kisəni də üstələyir. Ölkədə əsasən yüksək keyfiyyətli və premium qəhvə bazarında geniş istifadə olunan “Arabica” növü yetişdirilir.
Dünyanın ikinci ən böyük qəhvə istehsalçısı olan Vyetnam 31,7 milyon kisə ilə qlobal istehsalın 18 faizini təşkil edir. Son onilliklərdə “Robusta” növünün istehsalının sürətlə artması sayəsində ölkə 1999-cu ildə Kolumbiyanı geridə qoyaraq ikinci pilləyə yüksəlib. “Robusta” daha yüksək kofein tərkibinə malik olduğundan əsasən həll olunan qəhvə və espresso qarışıqlarında istifadə edilir.
İlk beşlikdə Kolumbiya (12,5 milyon kisə), İndoneziya (12,4 milyon kisə) və qəhvənin vətəni hesab olunan Efiopiya (11,6 milyon kisə) yer alır. Bu beş ölkə birlikdə dünya qəhvə istehsalının təxminən dörddə üçünü təmin edir.
Araşdırmaya görə, son onilliklərdə qəhvə istehsalının coğrafiyası da dəyişib. 1960-cı illərdə Asiyanın qlobal istehsaldakı payı 5 faizdən az olduğu halda, hazırda bu göstərici 32 faizə yüksəlib. Bu artım əsasən Vyetnamda “Robusta” plantasiyalarının genişlənməsi hesabına baş verib. İndoneziya, Hindistan, Çin, Malayziya, Tailand, Laos və Filippin də regionun əsas istehsalçıları sırasındadır.
Mütəxəssislər bildirirlər ki, iqlim dəyişikliyi qəhvə istehsalı üçün əsas risklərdən biri olaraq qalır. Temperaturun yüksəlməsi, əlverişli əkin sahələrinin azalması və zərərvericilərin artması gələcəkdə istehsalın sabitliyinə və qəhvə qiymətlərinə əlavə təzyiq göstərə bilər.
Dünyanın ən böyük qəhvə istehsalçıları aşağıdakı kimi olub:
Braziliya – 63 milyon kisə (35%)
Vyetnam – 31,7 milyon kisə (18%)
Kolumbiya – 12,5 milyon kisə (7%)
İndoneziya – 12,4 milyon kisə (7%)
Efiopiya – 11,6 milyon kisə (6%)
Uqanda – 7,10 milyon kisə (4%)
Hindistan – 6,43 milyon kisə (4%)
Honduras – 5,53 milyon kisə (3%)
Peru – 4,76 milyon kisə (3%)
Meksika – 4,08 milyon kisə (2%)
Qvatemala – 3,16 milyon kisə (1,8%)
Nikaraqua – 2,56 milyon kisə (1,4%)
Çin – 1,90 milyon kisə (1,1%)
Malayziya – 1,50 milyon kisə (0,8%)
Tanzaniya – 1,45 milyon kisə (0,8%)
Fil Dişi Sahili – 1,30 milyon kisə (0,7%)
Kosta Rika – 1,16 milyon kisə (0,6%)
Tailand – 0,90 milyon kisə (0,5%)
Keniya – 0,85 milyon kisə (0,5%)
Papua Yeni Qvineya – 0,80 milyon kisə (0,4%)
Salvador – 0,59 milyon kisə (0,3%)
Venesuela – 0,50 milyon kisə (0,3%)
Laos – 0,48 milyon kisə (0,3%)
Filippin – 0,45 milyon kisə (0,3%)
Ekvador – 0,35 milyon kisə (0,2%)
Ruanda – 0,35 milyon kisə (0,2%)