“Ermənistanın ixracı ilə bağlı problemlərin həlli və Avrasiya İqtisadi İttifaqının (Aİİ) qaydalarına riayət olunmasının təmin edilməsi çox vacibdir, əks halda mövcud böhran təşkilatın dağılmasına səbəb ola bilər”.
Yenavaz.com xəbər verir ki, bunu Ermənistanın Baş naziri Nikol Paşinyan iyulun 29-da jurnalistlərlə söhbətində bildirib.
Baş nazir Aİİ daxilindəki münasibətlər və alternativ siyasət məsələsi barədə ətraflı məlumat verib.
“Aİİ ilə münasibətlərdə problemlər məlum səbəblərdən yaranıb - çünki Ermənistan alternativlər tapmağa çalışıb. Qanunilik siyasətdə, o cümlədən Rusiyadan olan tərəfdaşlar arasında çox vacibdir. Sual budur ki, bu alternativ nə vaxt reallaşdırılmalıdır. Mayın 29-da Aİİ ölkələrinin liderləri öz bəyanatlarında Ermənistanın Aİ üzvlüyü ilə bağlı referendum keçirmək hüququnu tanıdılar və bununla da, bu gündəliyin legitimliyini qəbul etdilər”, - Ermənistanın Baş naziri bildirib.
O, daha sonra Rusiya rəhbərliyi ilə dialoqunun təfərrüatlarını və referendumla bağlı mövqeyini açıqlayıb.
“Mən Rusiya Prezidentinə açıq şəkildə bildirdim ki, referendum subyektin özü olmadan keçirilə bilməz. Buna görə də, referendum keçirilməzdən əvvəl Avropa İttifaqına qoşulmaq üçün ərizə təqdim etməliyik. Bu alternativi inkişaf etdirməliyik. Biz Ermənistanın alternativlər hazırlamaq üçün qanuni hüququ olduğu barədə ortaq bir anlayışa gəldik və mən bu yolda davam edəcəyimizi bildirdim”, - Paşinyan əlavə edib.
Digər tərəfdən, Ermənistan Baş naziri Aİİ bazarında yaranan maneələrin tez bir zamanda aradan qaldırılmaması halında nəticələr barədə xəbərdarlıq edib.
“Ermənistanın alternativsiz qalacağı bir vəziyyəti təsəvvür edə bilmirəm. Bizim həmişə alternativimiz olmalıdır. Və əgər bu məsələ tez bir zamanda həll olunmasa, bu, Aİİ üçün sonun başlanğıcı olacaq”, - Paşinyan bildirib.
Qeyd edək ki, bundan əvvəl Rusiya Prezidenti Vladimir Putin Ermənistan vətəndaşlarının Aİ və Aİİ arasında seçim etməli olacaqları referendum keçirilməsinin zəruriliyini qeyd etmişdi.
Tətbiqimizi yükləyə bilərsiniz
