Durov beynəlxalq axtarışa verildi

“Telegram”ın qurucusu Pavel Durov beynəlxalq axtarışa verilib.
Yeniavaz.com xəbər verir ki, bu barədə Rusiya Federal Təhlükəsizlik Xidmətinin (FTX) ictimaiyyətlə əlaqələr mərkəzi məlumat yayıb.
Bildirilib ki, “Telegram”ın administrasiya rəhbəri Rusiya Cinayət Məcəlləsinin 205.1-ci maddəsinin 1.1-ci hissəsi (terror fəaliyyətinə kömək) ilə cinayət işi üzrə ittiham olunub.
“Telegram” administrasiyası Rusiya qanunlarını pozaraq, bu messencerin Ukrayna xüsusi xidmət orqanları, terrorçu və ekstremist təşkilatlar tərəfindən Rusiya Federasiyasında təxribat və terrorizm, kütləvi qətl və kiberfırıldaqçılıq aktlarının hazırlanması və əlaqələndirilməsi üçün fəal şəkildə istifadə olunan çoxsaylı kanallarını, çatlarını və botlarını silməyib. Bunun nəticələri qadınlar və uşaqlar da daxil olmaqla çoxsaylı insan tələfatına, eləcə də milyardlarla dollarlıq maddi ziyana səbəb olub”, - mərkəz qeyd edib.
Mərkəz qeyd edir ki, 2025-ci ilin iyul ayından etibarən Moskva, Sankt-Peterburq və digər şəhərlərdə 12 yaşdan 22 yaşa qədər 46 Rusiya vətəndaşı saxlanılıb. Onlar bu kanal vasitəsilə cəlb ediliblər və Ukrayna kəşfiyyat orqanlarının əmri ilə hüquq-mühafizə orqanlarının əməkdaşlarına hücumlardan tutmuş nəqliyyat və rabitə obyektlərinə yanğın törətməyə qədər müxtəlif təxribat aktları törədiblər. Cinayət məsuliyyəti yaşına çatmış cinayətkarlar ittiham olunub və uzunmüddətli həbs cəzası ilə üzləşiblər.
FTX-nin məlumatına görə, qadın kimi təqdim edilən Ukrayna kəşfiyyat zabitləri söhbət otağında gənc ruslara yaxınlaşaraq, fişinq linkləri vasitəsilə film biletləri və ya hədiyyələr üçün pul ödəmələrini istəyiblər və daha sonra pulun Ukrayna Silahlı Qüvvələrinin hesablarına köçürüldüyünü iddia edərək onları şantaj yolu ilə hücumlar və yanğınlar törətməyə təhrik ediblər.
FTX qeyd edib ki, “Dayvinchik / Leo - tanışlıq, ünsiyyət və yeni dostlar” çatbotu qadağan olunmuş məlumatlar ehtiva etdiyinə görə 23 dekabr 2025-ci ildə “Roskomnadzor”un Vahid Qadağan olunmuş Saytlar Reyestrinə əlavə edilib. Lakin “Telegram” messencer administrasiyası Ukrayna kəşfiyyat orqanları və terror təşkilatları tərəfindən təxribat, kütləvi qətl və kiberfırıldaqçılığı planlaşdırmaq və əlaqələndirmək üçün istifadə edilən digər kanallar da daxil olmaqla bu məlumatları silməyib.
“Roskomnadzor” Durovun administrasiyasına qanunsuz məzmunların silinməsi tələbi ilə 150 ​​mindən çox sorğu göndərsə də, heç bir nəticə olmayıb. 
FTX sənədlərinə görə, 2022-ci ildən bəri Rusiyada “Telegram” vasitəsilə törədilən 153 000 cinayət qeydə alınıb.
205.1-ci maddənin 1.1-ci hissəsinə əsasən, Durov 8 ildən 15 ilə qədər və ya ömürlük həbs cəzası ilə üzləşə bilər.
Qeyd edək ki, bundan əvvəl Durov Fransada “Telegram” işi ilə bağlı bir dəfə dindirilib.