Hörmüz boğazından üçüncü dəhlizin açılması müzakirə olunur

İran və Oman nümayəndələri Hörmüz boğazından gəmiçiliklə bağlı razılaşma üzərində danışıqlar aparırlar.
Yeniavaz.com xəbər verir ki, bu barədə “Bloomberg” agentliyi məlumat yayıb.
Agentliyin məlumatına görə, tərəflər digər məsələlərlə yanaşı, hərbi münaqişə səbəbindən əvvəllər istifadə olunmayan üçüncü marşrutun bərpasını da müzakirə edirlər.
Bildirilir ki, gəmilər ya İrana yaxın şimal marşrutu, ya da Omana daha yaxın cənub marşrutu ilə tranzit keçir. Üçüncü dəhliz bu iki marşrut arasında yerləşir.
“Bloomberg”in məlumatına görə, Oman nümayəndələri razılaşmanın bir neçə gün ərzində elan ediləcəyini istisna etmirlər.
Qeyd edək ki, ABŞ-İran münaqişəsinin son eskalasiyası 8 iyulda başlayıb. Vaşinqton və Tehran arasında memorandumun imzalanmasından bəri ilk dəfə olaraq ABŞ qüvvələri İran ərazisinə bir neçə hücum təşkil edib və bu, guya Hörmüz boğazında ticarət gəmisinə edilən hücuma cavab olaraq baş verib. Elə həmin gün ABŞ Prezidenti Donald Tramp İranla atəşkəsin bitdiyini elan edib. Cavab olaraq Tehran Bəhreyn, İordaniya, Qətər, Küveyt, BƏƏ və Oman da daxil olmaqla, Yaxın Şərqdəki ABŞ hədəflərinə hücum etməyə başlayıb. 24 iyulda hər iki tərəf hücumlarını dayandırıb.