ABŞ Silahlı Qüvvələri İranda məktəbə endirilən zərbə zamanı istifadə edilmiş ola biləcək kəşfiyyat məlumatlarını indiyədək tam və standart prosedura uyğun şəkildə yoxlamayıb.
Yeniavaz.com xəbər verir ki, bu barədə CNN telekanalı mənbəyə istinadla məlumat yayıb.
Bildirilir ki, peyk görüntüləri də daxil olmaqla kəşfiyyat məlumatlarının tam paketi hələ də ətraflı təhlil edilməyib.
“Araşdırmanın bu mərhələsinin məqsədi hadisənin dəqiq necə baş verdiyini və zərbənin ümumi əməliyyatın gedişinə necə təsir etdiyini müəyyənləşdirməkdir. ABŞ-nin hərbi rəhbərliyi belə bir genişmiqyaslı yoxlamanın aparılması barədə göstəriş verməyib. Bunun əvəzinə yalnız ilkin qiymətləndirmə həyata keçirilib. Bu qiymətləndirmə isə hədəf seçilmiş obyektin vurulub-vurulmadığını və ona hansı həcmdə ziyan dəydiyini müəyyən etməyə yönəlib”, - telekanalın məlumatında deyilir.
Xatırladaq ki, daha əvvəl CNN ABŞ hərbi komandanlığının fevral ayında İranda bir sıra hədəflərə, o cümlədən Minab şəhərindəki qızlar məktəbinə zərbə endirilməsini təsdiqləməsi barədə məlumat yaymışdı.
Qeyd edək ki, bu il fevralın 28-də İran hakimiyyəti ABŞ və İsrailin Minab şəhərindəki qızlar üçün ibtidai məktəbə zərbə endirdiyini açıqlayıb. Rəsmi məlumata görə, hücum nəticəsində 175 nəfər həlak olub, onlardan 168-i məktəbli qız olub, daha 95 nəfər isə müxtəlif dərəcəli xəsarətlər alıb.
ABŞ Prezidenti Donald Tramp daha sonra hadisəyə görə İran Silahlı Qüvvələrini günahlandırsa da, bunu təsdiqləyən heç bir sübut təqdim etməyib.
İyulun 15-də “Fox News” telekanalına müsahibəsində Donald Tramp ABŞ-nin bu məsələ ilə bağlı apardığı araşdırmanın nəticələrinin böyük ehtimalla heç vaxt ictimaiyyətə açıqlanmayacağını bildirib.
Tətbiqimizi yükləyə bilərsiniz
