Son dəfə həyat yoldaşınızıla nə vaxt gəzməyə çıxmısınız? Və ya son dəfə həyat yoldaşınızıla nə vaxt alış-verişə getmisiniz? Bir yerdə yemək yediyinizi, ya da bir yerdə çay içdiyinizi xatırlayırsınızmı?..
Adətən bu suallara cavab verən tərəflər gəzməyə uşaqları ilə birlikdə getdiklərini, ya da həyat yoldaşları çox məşğul olduğu üçün belə işlərə vaxt ayıra bilmədiklərini deyirlər. Əlbəttə ki, uşaqlarla birlikdə gəzməyə getmək və ya gözəl bir yerdə istirahət etmək çox yaxşıdır. Ancaq bu da bir həqiqətdir ki, ailədə uşaqlar dünyaya gəldikdən sonra tərəflər az qala bir-birilərini unudurlar və nəticədə, bir-birilərindən soyumağa başlayırlar. Ona görə də, belə halların baş verməməsi üçün vaxtaşırı həyat yoldaşınızla evdən kənara çıxmalısınız. Üstəlik, “Biz onsuz da evdə kifayət qədər bir yerdə oluruq” fikirlərinə də qapılmamalısınız. Əlbəttə ki, biz bununla ev daxilindəki ünsiyyətin faydasız olduğunu demək istəmirik. Ancaq evliliyinizə canlılıq gətirmək istəyirsinizsə, ya da evliliyinizi monotonluqdan xilas etmək istəyirsinizsə, ünsiyyətinizi evdən kənara da çıxarın. Bir də unutmayın ki, yeni məkanlar həm yeni hisslər, həm də yeni həyəcanlar deməkdir.
Qeyd: Bütün bu dediklərimizi bir şərt kimi yox, bir təklif kimi qəbul edin. Üstəlik, bu iş üçün çox böyük bir vaxta ehtiyac olmadığını da unutmayın.
Aygün Vəliyeva
Tətbiqimizi yükləyə bilərsiniz
