“Forbes” jurnalı 2026-cı il Dünya Kuboku ilə bağlı maraqlı rəqəmlər açıqlayıb.
Yeniavaz.com açıqlanan məlumatlara istinadən xəbər verir ki, Dünya Kubokunda iki milyarder futbolçu yer alır: Lionel Messi və Kriştianu Ronaldo.
“Forbes” Lionel Messinin sərvətini 1,1 milyard dollar, Kriştiano Ronaldonun sərvətini isə 1,2 milyard dollar olaraq qiymətləndirir.
41 yaşlı Ronaldo son 12 ay ərzində vergilər və agent haqları çıxılmadan təxminən 300 milyon dollar qazanıb. Bu göstərici onu Dünya Kubokunda ən çox qazanan futbolçu və dünyanın ən çox qazanan idmançısı edib. Lakin Ronaldo artıq Portuqaliya millisi ilə Dünya Kubokundan kənarlaşdırılıb.
Kriştiano Ronaldo və Lionel Messi altıncı dəfə Dünya Kubokunda çıxış edirlər. Hər iki futbolçu Dünya Kubokunda debütünü 2006-cı ildə Almaniyada keçirilən turnirdə edib. Ronaldo altı Dünya Kubokunun hamısında qol vuran yeganə futbolçudur. Lionel Messi artıq Dünya Kuboklarında 21 qol vurub.
O, Argentinanın ilk oyununda het-trik edib. Altı gün sonra daha iki qol vurub və növbəti üç oyunun hər birində bir dəfə fərqlənib.
Bunun nəticəsində argentinalı futbol ulduzu builki Dünya Kubokunda artıq səkkiz qol vurub və hazırda bombardirlər yarışına liderlik edir.
Messini Fransadan Kilian Mbappe və Norveçdən Erlinq Holan izləyir. Hər iki futbolçunun aktivində yeddi qol var.
FIFA may ayında Dünya Kubokunun finalı üçün premium biletləri 32 min 970 dollara satışa çıxarıb.
Bu qiymət əvvəlki analoji biletin 10 min 990 dollarlıq qiymətindən üç dəfədən çox bahadır. Həmçinin 2022-ci ildə Qətərdə keçirilən Dünya Kubokunun finalı üçün maksimum qiymət olan 1 607 dollardan xeyli yüksəkdir.
Satıcılardan biri təkrar satış bazarında dörd bileti hər biri 2,3 milyon dollara satışa çıxarıb.
Hazırda ən ucuz biletin qiyməti təxminən 11 min dollardır.
Qeyd edək ki, FIFA həm alıcıdan, həm də satıcıdan 15 faiz komissiya alır.
Bunlardan başqa VIP təkliflərinə aşağıdakılar daxildir:
- Sahənin kənarında 12 nəfərlik paket – 1 milyon dollardan başlayır;
- 24 nəfərlik loja – 1,44 milyon dollardan başlayır;
- Kubok mərasimində meydanda olmaq – adambaşına 600 min dollar.
“Forbes” həmçinin qeyd edir ki, Dünya Kuboku kubokunda istifadə edilən təxminən 11 funt (5 kiloqram) çəkidə 18 karatlıq qızılın bugünkü qiymətlərlə dəyəri təxminən 713 min dollardır.
Dünya Kubokunun qalibi 50 milyon dollar mükafat qazanacaq. Pley-off mərhələsinə vəsiqə qazanan 32 komandanın hər biri ən azı 11 milyon dollar, qrup mərhələsində mübarizəni dayandıran 16 komandanın hər biri isə 10 milyon dollar əldə edəcək.
Müxtəlif xərclər də daxil olmaqla ümumi mükafat fondu 871 milyon dollara çatır. 2022-ci ildə isə bu rəqəm 440 milyon dollar idi.
“Fox Sports” oyunlar arasında üç dəqiqəlik “su fasilələri” zamanı yayımlanan reklamlardan ən azı 250 milyon dollar gəlir əldə etməyi gözləyir.
Turnirdə 104 oyun keçiriləcək və ümumilikdə 624 dəqiqəlik fasilə olacaq.
30 saniyəlik reklam çarxının qiyməti 200 min dollardan 750 min dollara qədər dəyişir.
FIFA eyni zamanda Dünya Kubokunda iştirak edən futbolçuların klublarına 250 milyon dollar ödəyəcək.
Proqrama əsasən, hər bir futbolçu üçün gündə minimum 5 min dollar təmin edilir.
2026-cı il Dünya Kubokunun büdcəsi isə ümumilkdə 3,8 milyard dollardır. Bu məbləğin 1,1 milyard dolları əməliyyat xərclərinə, 159 milyon dolları nəqliyyat xərclərinə, 23 milyon dolları isə hakimlər üçün nəzərdə tutulub.
FIFA 2026-cı il Dünya Kuboku ilə başa çatan dörd illik dövr ərzində ümumi gəlirinin 13 milyard dollara çatacağını gözləyir. Bu gəlirin 3,9 milyard dollarının televiziya hüquqlarından, 3 milyard dollardan çoxunun isə qonaqpərvərlik və bilet satışlarından əldə ediləcəyi proqnozlaşdırılır.
Müqayisə üçün, Qətərdə keçirilən 2022-ci il Dünya Kubokunun dörd illik dövrü FIFA-ya 7,6 milyard dollar gəlir gətirib. Beynəlxalq Olimpiya Komitəsi isə 2024-cü ildə 4,4 milyard dollar kommersiya gəliri əldə edib.
Murad Məmmədov
Tətbiqimizi yükləyə bilərsiniz
