Hər həftə neçə nəfər süni intellekt köməkçilərindən istifadə edir?

Dünyada hər həftə 1 milyarddan çox insan “ChatGPT”, “Claude” və “Gemini” kimi süni intellekt (Sİ) sistemlərindən istifadə edir.
Yeniavaz.com xəbər verir ki, bu barədə məlumat BMT-nin süni intellekt üzrə müstəqil beynəlxalq elmi panelinin ilkin hesabatında öz əksini tapıb.
Hesabatda qeyd olunur ki, süni intellektin inkişaf etdirilməsi hazırda məhdud sayda ölkə və şirkət tərəfindən idarə olunur. Xüsusilə, süni intellekt məhsullarının yaradılmasında istifadə edilən ən yaxşı 500 superkompüterin hesablama gücünün təxminən 75%-i ABŞ-nin, təxminən 15%-i isə Çinin payına düşür. Hesabatda həmçinin qeyd olunur ki, bu iki ölkədəki şirkətlər demək olar ki, bütün aparıcı ümumi təyinatlı modelləri yaradırlar.
Qeyd edək ki, Süni İntellekt üzrə Müstəqil Beynəlxalq Elmi Panel BMT Baş Assambleyasının 26 avqust 2025-ci il tarixində qəbul edilmiş 79/325 saylı qətnaməsi ilə geniş maraqlı tərəflərlə hökumətlərarası danışıqlar və məsləhətləşmələrdən sonra yaradılıb. O, təşkilatın bütün beş regional qrupundan 40 müstəqil alim və ekspertdən ibarətdir. Onun mandatı süni intellektin inkişafının imkanları, riskləri və nəticələrinin elmi qiymətləndirilməsini hazırlamaqdır.