Ukrayna “Vtorovo”ya zərbə endirdiyini iddia edir

Ukrayna dronları Vladimir bölgəsindəki “Vtorovo” neft nasos stansiyasına bir ay ərzində ikinci dəfə hücum edib.
Yeniavaz.com xəbər verir ki, bu barədə Ukrayna Təhlükəsizlik Xidməti məlumat yayıb. 
İddiaya görə, UTX dronları obyektin texniki binasına zərbə endirib və bundan sonra partlayış baş verib.
Xidmət zərbəni təsdiqləmək üçün foto və ya video təqdim etməyib. Vladimir regional hakimiyyəti hadisə ilə bağlı şərh verməyib.
NASA tərəfindən idarə olunan FIRMS peyk yanğın monitorinqi layihəsinin məlumatlarına görə, neft nasos stansiyasının ərazisində yanğın yoxdur. Lakin FIRMS stansiyadan təxminən 10 kilometr aralıda yanğın qeydə alıb.
Qeyd edək ki, “Vtorovo” stansiyası Transneft-Yuxarı Volqaya məxsusdur. UTX stansiyanı yüngül neft məhsullarının ixrac limanlarına və daxili istehlakçılara daşınması üçün mühüm logistika mərkəzi adlandırıb. Neft məhsulları, digər istiqamətlər arasında, bu stansiya vasitəsilə Moskvaya daşınır. Ukrayna sonuncu dəfə stansiyaya iyunun 10-da hücum edib.
Ukrayna Rusiyadakı neft obyektlərinə müntəzəm olaraq hücum edir ki, bu da ölkədə yanacaq böhranına səbəb olub. Rusiyanın bir çox bölgəsində sakinlər benzin qıtlığından şikayətlənirlər.