Rusiya Xarici İşlər Nazirliyi Rusiya vətəndaşlarına Moldovaya səyahət etməkdən çəkinməyi tövsiyə edib.
Yeniavaz.com xəbər verir ki, bu barədə Nazirliyin rəsmi saytında dərc olunan bəyanatda bildirilib.
Buna əsas kimi isə, “Moldovadakı ruslara qarşı müxtəlif ayrı-seçkilik tədbirləri” göstərilib.
“Rusiya Xarici İşlər Nazirliyi bir daha Rusiya vətəndaşlarına Moldova Respublikasına səyahət etməkdən çəkinməyi tövsiyə edir. Rəsmi Kişinyov Rusiya əleyhinə siyasətinin bir hissəsi olaraq, Moldova Respublikasına daxil olan Rusiya vətəndaşlarına qarşı ayrı-seçkilik tədbirlərini gücləndirir. Bu Qərb nəzarətçiləri tərəfindən də dəstəklənir. Buraya Kişinyov hava limanına gələn Rusiya pasportu sahiblərinə qarşı açıq şəkildə zorakılıq daxildir və onlar alçaldıcı axtarışlara, dindirilmələrə və yoxlamalara məruz qalırlar. Tranzit zonasında əsas yaşayış şəraiti, su və qidaya çıxış olmadan saatlarla gözləmə halları tez-tez baş verir. Mobil cihazları Moldova rəsmilərinə “könüllü” şəkildə təhvil vermək üçün qanunsuz tələblər irəli sürülür və bundan sonra onlarda saxlanılan məlumatlar qanunsuz olaraq araşdırılır”, - bəyanatda qeyd olunub.
Qeyd olunub ki, Rusiya vətəndaşlarının bu cür “yoxlama prosedurlarından” sonra əsassız olaraq ölkəyə girişinə icazə verilməməsi halları da nadir deyil:
“Kişinyovdan yola düşərkən tez-tez yoxlama prosedurlarını süni şəkildə təxirə salmaq praktikasından istifadə olunur və bu da sərnişinlərin uçuşlarını qaçırmasına səbəb olur. Bundan əlavə, Moldova hakimiyyəti Kişinyovdakı Rusiya səfirliyinin konsulluq işçilərinin Rusiya vətəndaşları ilə görüşməsinə icazə vermir. Rusiya diplomatik nümayəndəliyinin sorğularına məhəl qoyulmur və bu da vətəndaşlarımıza vaxtında konsulluq dəstəyi göstərməyi faktiki olaraq qeyri-mümkün edir”.
Tətbiqimizi yükləyə bilərsiniz
