“ABŞ Çindən robot idxalına qoyulan məhdudiyyətləri sərtləşdirəcək” − “Politico”

ABŞ Ticarət Nazirliyi milli təhlükəsizlik təhdidləri səbəbindən Çindən robot idxalına yeni məhdudiyyətlər tətbiq etməyi planlaşdırır.
Yeniavaz.com xəbər verir ki, bu barədə “Politico” öz mənbələrinə istinadən məlumat yayıb.
Bildirilib ki, ABŞ administrasiyasının robot silahları sahəsində silahlanma yarışı proqnozlaşdırılır.
Qəzetin məlumatına görə, Ticarət Nazirliyi hazırda Çin hökumətindən subsidiya alan Çin robot istehsalçılarının məhsullarını qiymətləndirir. ABŞ administrasiyası Çin hökumətinin bu sənayeyə dəstəyini milli təhlükəsizlik təhdidi kimi görür, çünki subsidiyalı Çin robotları Amerika istehsalçıları rəqabət aparmaq üçün lazım olan istehsal miqyasına çatmazdan əvvəl qlobal bazarları fəth edə bilər.
Qəzetin mənbələrinin qeyd etdiyi kimi, ABŞ hökumətinin nəzərində süni intellekt texnologiyaları üçün çiplərdən əlavə, robototexnika Çinlə texnoloji rəqabətdə növbəti döyüş meydanına çevrilib.
Nəşrin mənbələri ABŞ Ticarət katibi Hovard Lutnikin aparıcı ABŞ robototexnika şirkətləri və maliyyə qurumlarının nümayəndələri ilə görüş keçirdiyini bildirib. Onların arasında “SpaceX”, “Boston Dynamics”, “Siemens”, “Rockwell Automation”, eləcə də “JPMorgan Chase” və “Goldman Sachs” banklarının nümayəndələri də var idi.
“Biz istəmirik ki, Amerikada hökumət tərəfindən subsidiyalaşdırılan robotlar bizə hücum etsin. Bu, yaxınlaşan silahlanma yarışıdır - robot silahları dövrü başlayır”, - mənbələrdən biri nazirin sözlərini sitat gətirib.