FIFA Dünya Kubokunun qrup mərhələsinin ikinci turunun növbəti oyunları keçirilib.
Yeniavaz.com xəbər verir ki, Belçika İranla 0-0 heç-heçə edib.
Oyun ABŞ-nin Kaliforniya ştatının İnqlvud şəhərində baş tutub.
İranlı hücumçu Mehdi Taremi 25-ci dəqiqədə qol vursa da, VAR sisteminin müdaxiləsndən sonra qol ofsayd vəziyyəti ilə əlaqədar hesaba alınmayıb.
Belçika 66-cı dəqiqədə müdafiəçi Natan Nqoyun qırmızı vərəqə almasından sonra azlıqda qalıb.
Misir və Yeni Zelandiya arasında keçirilən oyun isə 3-1 hesabı ilə Misirin xeyrinə başa çatıb.
Oyun Kanadanın Vankuver şəhərində keçirilib.
Qələbə qollarını Mustafa Ziko (58-ci dəqiqə), Məhəmməd Salah (67) və Trezeqe (82) vurub. Məğlublardan isə Finn Serman (15) fərqlənib.
Misir komandası tarixində ilk dəfə Dünya Kuboku matçında qalib gəlib. Onlar əvvəllər Dünya Kuboklarında səkkiz oyun keçirmiş, üç heç-heçə etmiş və beşində məğlub olmuşdular.
Bu, Yeni Zelandiyanın Dünya Kubokunda üçüncü iştirakıdır. 1982-ci il Dünya Kubokunda onlar üç məğlubiyyətlə qrup mərhələsindən çıxa bilməmişdilər. 2010-cu il Dünya Kubokunda da onlar üç heç-heçə ilə pley-off mərhələsinə yüksələ bilməmişdilər.
İki turdan sonra Misir G qrupuna dörd xalla liderlik edir. İran və Belçika növbəti pillələrdədir (hər ikisi 2 xalla). Yeni Zelandiya qrupun sonuncu pilləsindədir (1 xal). Qrup mərhələsinin final mərhələsində Misir və İran, eləcə də Belçika və Yeni Zelandiya komandaları qarşılaşacaq. Oyunlar iyunun 27-si gecəsi keçiriləcək.
Digər tərəfdən, Uruqvay qrup mərhələsinin ikinci tur matçında Kabo-Verde ilə 2-2 heç-heçə edib. Oyun ABŞ-nin Florida ştatının Mayami şəhərində baş tutub.
Uruqvaylıların qollarını Maksimiliano Arauxo (44-cü dəqiqə) və Aqustín Kanobbio (45+6) vurub. Kabo-Verdenin qollarını yarımmüdafiəçisi Kevin Lenini (21) və Elio Varela (61) reallaşdırıb.
Kabo-Verde Dünya Kuboku tarixində ikinci oyununu keçirib. Bundan əvvəl komanda cari turnirdə İspaniya ilə 0-0 hesablı heç-heçə edib.
H qrupuna İspaniya 4 xalla liderlik edir, ardınca Kabo-Verde və Uruqvay (hər ikisi 2 xalla) gəlir. Səudiyyə Ərəbistanı qrupun sonuncu pilləsindədir (1 xal).
Qrup mərhələsinin son turunda Uruqvay İspaniya ilə, Kabo-Verde isə Səudiyyə Ərəbistanı ilə qarşılaşacaq. Oyunlar 27 iyun gecəsi keçiriləcək.
Tətbiqimizi yükləyə bilərsiniz
