Tramp ən yaşlı liderlər siyahısına əlavə olundu − Doğum günüdür

İyunun 14-ü ABŞ Prezidenti Donald Tramp 80 yaşını qeyd edir. Bu, onu dünyanın ən yaşlı liderlərindən birinə çevirir.
Yeniavaz.com xəbər verir ki, bunu “Pew Research Center”in təqdim etdiyi məlumatlar göstərir.
Tədqiqatçıların təhlilinə görə, Birləşmiş Millətlər Təşkilatına üzv 186 ölkənin hazırkı liderlərindən yalnız 16-sı Donald Trampdan daha yaşlıdır.
Ən yaşlı liderlər 93 yaşlı Kamerun Prezidenti Paul Biya və 90 yaşlı Səudiyyə Ərəbistanı Kralı Salman bin Əbdüləziz Əl Səuddur.
Dünyanın ən yaşlı liderlərinin çoxu Afrika ölkələrində yaşayır. Biyadan əlavə, ən yaşlı on lider arasında Malavi, Kot-d'İvuar, Ekvatorial Qvineya, Zimbabve, Konqo Respublikası və Uqanda liderləri də var. Digər tərəfdən, ən gənc milli lider 36 yaşlı Balen Şahdır. O, gənclərin rəhbərlik etdiyi etirazlarda əvvəlki hökumətin devrilməsinə kömək etdikdən sonra 2026-cı ilin mart ayında Nepalın Baş naziri olub.
Ən gənc liderlər arasında İslandiyanın Baş naziri Kristrun Frostadottir və Burkina Faso Prezidenti İbrahim Traore də var, hər ikisi 38 yaşındadır.
Araşdırma mərkəzinin təhlilinə görə, bütün milli liderlərin orta yaşı 63-dür.
Xatırladaq ki, ABŞ-də prezidentliyə namizədlər üçün konstitusiya ilə yuxarı yaş həddi yoxdur. Minimum yaş həddi isə 35-dir. Beləliklə, Donald Tramp prezidentlik müddətini 2029-cu ilin yanvar ayında 83 yaşında başa vuracaq.