“ABŞ-İran razılaşmalarının yoxlanılmasında vasitəçi kimi çıxış edə bilərik” − Qrossi

Beynəlxalq Atom Enerjisi Agentliyinin (BAEA) baş direktoru Rafael Qrossi bildirib ki, onun təşkilatı ABŞ və İran arasında potensial nüvə enerjisi müqavilələrinə uyğunluğun yoxlanılmasında vasitəçi kimi çıxış etməyə hazırdır.
Yeniavaz.com xəbər verir ki, bu barədə “Yonhap” xəbər agentliyi məlumat yayıb.
“Agentlik üçün ən vacib şey yoxlamadır və bizim iştirakımız yerinə yetirilməli olan çox vacib bir rəsmiyyətdir. Onlar razılaşıb bizdən yoxlama aparmağımızı istədikdə, mən BAEA-nın İdarə Heyətinə müraciət etməli və onlardan icazə istəməli olacağam”, - Qrossi Vyanada jurnalistlər üçün BAEA tərəfindən təşkil edilən seminarda beynəlxalq media nümayəndələri ilə görüşdə deyib.
Daha əvvəl ABŞ Prezidenti Donald Tramp bildirib ki, Vaşinqton və Tehran 14 iyun tarixinə qədər Hörmüz boğazını tamamilə açacaq bir razılaşmanı yekunlaşdırmalıdırlar. Eyni zamanda, Pakistanın Baş naziri Şahbaz Şərif ABŞ və İran arasında sülh müqaviləsinin yaxın 24 saat ərzində yekunlaşdırılacağını və bundan sonra tərəflər arasında texniki səviyyədə danışıqların aparılacağını bildirib.