Pauls Butkeviçs vəfat edib

Latviyalı aktyor Pauls Butkeviçs vəfat edib.
Yeniavaz.com xəbər verir ki, bu barədə Latviya Kinematoqrafçılar İttifaqı məlumat yayıb.
Bildirilib ki, aktyor iyunun 12-də dünyasını dəyişib.
1940-cı ildə anadan olan Butkeviçs yaradıcılıq fəaliyyətinə 1950-ci illərin sonlarında başlayıb. Əvvəlcə VEF fabrikində texniki peşə və mühəndislik fəaliyyəti ilə məşğul olan sənətçi sonradan teatr sahəsinə yönələrək Riqada səhnə fəaliyyətinə qoşulub. O, Robert Liqerin rəhbərliyində Riqa Pantomima Teatrında, daha sonra isə Dailes Teatrının eksperimental studiyasında təhsil alıb. Bununla yanaşı, Riqa Politexnik İnstitutu və Latviya Universiteti daxil olmaqla bir neçə ali təhsil müəssisəsində oxuyub.
Aktyorun kino karyerası 1963-cü ildə televiziya layihələri ilə başlayıb. Qısa müddət sonra o, Ada Neretniyetse və Rolands Kalninşın filmlərində diqqətçəkən rollar əldə edib. Butkeviçsə geniş şöhrət qazandıran əsas ekran işi isə 1967-ci ildə çəkilən “Dərin nəfəs al” filmində canlandırdığı Ralf obrazı olub. Filmdəki musiqi nömrələri sonradan Latviya kino irsinin mühüm hissəsinə çevrilib.
Sovet və Rusiya kinosundakı fəaliyyəti də onun yaradıcılığında xüsusi yer tutub. Aktyor məşhur “Baharın on yeddi anı” teleserialında əlaqə zabiti rolunu ifa edib, həmçinin “Qardemarinlər, irəli!” tarixi filmində çəkilib.
Yaradıcılığı boyunca təxminən 150 film layihəsində rol alan Butkeviçs Latviyada öz nəslinin ən çox tələb olunan aktyorlarından biri hesab olunurdu. O, həmçinin Almaniya, Polşa, İsveç, Danimarka, Hindistan və digər ölkələrdə film çəkilişlərində iştirak edib.