Xaricdən 12 qəpiyə gətirilən saqqızlar marketlərdə dəfələrlə baha satılır – Siyahı

Bu ilin ilk 3 ayı ərzində Azərbaycana xarici ölkələrdən 133,34 ton şəkərli və ya şəkərsiz saqqız idxal edilib.
Yeniavaz.com açıqlanan rəsmi məlumatlara istinadən xəbər verilir ki, idxal olunan saqqızın ümumi gömrük dəyəri 620,91 min dollar olub.
Beləliklə, idxal edilən saqqızın 1 kiloqramının orta gömrük dəyəri 4,7 dollar (7,9 manat) təşkil edib.
Qeyd edək ki, Azərbaycanda pərakəndə satış məntəqələrində saqqızlar əsasən 14-15 qramlıq çəkidə satılır. Bu isə o deməkdir ki, idxal olunan saqqızın 15 qramının orta gömrük dəyəri 12 qəpiyə bərabərdir.
Məlumat üçün bildirək ki, bu ilin ilk 3 ayında saqqız ən aşağı qiymətə İrandan, ən baha qiymətə Fransadan idxal edilib. İrandan gətirilən saqqızın 1 kiloqramının orta gömrük dəyəri 3,4 manat, Fransadan gətirilən saqqızın 1 kiloqramının orta gömrük dəyəri 62,9 manat olub.
Qeyd edək ki, idxal olunan saqqız Azərbaycana bu ölkələrdən gətirilib:
Türkiyə – 81,29 ton (15 qramının orta gömrük dəyəri 10 qəpik);
Türkmənistan – 17,39 ton (14 qəpik);
Pakistan – 10,63 ton (7 qəpik);
Çin – 10,15 ton (11 qəpik);
Rusiya – 9,73 ton (22 qəpik);
İndoneziya – 1,98 ton (53 qəpik);
İran – 1,65 ton (5 qəpik);
Yaponiya – 0,08 ton (55 qəpik);
İspaniya – 0,25 ton (23 qəpik);
Almaniya – 0,15 ton (41 qəpik);
Fransa – 0,02 ton (94 qəpik);
Polşa – 0,01 ton (41 qəpik);
Şimali Makedoniya – 0,01 ton (23 qəpik).

Onu da bildirək ki, Azərbaycanda pərakəndə satış məntəqələrində 14-15 qramlıq çəkidə satılan saqqızların ən aşağı satış qiyməti 70-80 qəpik təşkil edir. Bu isə pərakəndə satış məntəqələrində 1 kiloqram saqqızın ən aşağı satış qiymətinin təxminən 47 manata bərabər olduğunu göstərir.

Elnur Əli