Seul məhkəməsi Cənubi Koreyanın keçmiş prezidenti Yun Sok Yolu hərbi vəziyyət elan etmək üçün bəhanə yaratmaq məqsədilə Pxenyana dronlar göndərdiyinə görə 30 il həbs cəzasına məhkum edib.
Yeniavaz.com xəbər verir ki, bu barədə “Yonhap” xəbər agentliyi məlumat yayıb.
Məlumata görə, məhkəmə Yun Sok Yolu düşmənə kömək etməkdə və səlahiyyətlərindən sui-istifadə etməkdə günahkar bilib.
Düşmənə kömək etmək ittihamı KXDR-lə birbaşa əlbir olmadan belə, Koreya Respublikasının hərbi maraqlarına zərər verildikdə istifadə olunur. Belə ki, 2024-cü ilin payızında Koreya Respublikası ərazisindən Pxenyan yaxınlığında vərəqələr paylamaq üçün bir neçə dron buraxılıb. Onlardan ən azı biri qəzaya uğrayıb və KXDR mühəndislərinin əlinə keçib.
Hakim bildirib ki, bu əməliyyatın hərbi maraqlara vurduğu ziyanın səviyyəsi ciddi görünməsə də, təqsirləndirilən şəxslər hərbi əməliyyatdan hərbi vəziyyət elan etmək üçün şərait yaratmaq məqsədilə istifadə edərək Şimali Koreyanı təhrik etməyə çalışıblar.
Məhkəmə əlavə edib ki, bu əməliyyat Şimali Koreyadan zibil şarlarının göndərilməsinə ədalətli cavab hesab edilə bilməz, çünki bu, milli təhlükəsizlik və ya müdafiə ilə əlaqəsi olmayan şəxsi səbəblərdən irəli gəlir. 2024-cü ilin yaz və yayında tibbi ləvazimatlar və təbliğat materialları göndərən fəallara cavab olaraq Şimali Koreyadan zibil şarları buraxılıb.
Qeyd edək ki, 2024-cü ilin dekabr ayında prezident Yun Sok Yol konstitusiyanı pozaraq hərbi vəziyyət elan edib və bunun üçün sonradan hakimiyyətdən uzaqlaşdırılıb.
Fevral ayının 19-da məhkəmə Yun Sok Yolu hərbi vəziyyət hadisələri ilə əlaqədar dövlət sisteminə qarşı üsyanda ittiham edərək ömürlük həbs cəzasına məhkum edib.
Tətbiqimizi yükləyə bilərsiniz
