Aviabilet qiymətlərinin bahalaşacağı gözlənilir

Aviaşirkətlər 2026-cı ildə təyyarə yanacağına əvvəlki illə müqayisədə təxminən 100 milyard dollar daha çox vəsait xərcləyəcək.
Yeniavaz.com “Forbes”ə  istinadən xəbər verir ki, bu barədə Beynəlxalq Hava Nəqliyyatı Assosiasiyasının (IATA) baş direktoru Villi Uelş təşkilatın Rio-de-Janeyroda keçirilən illik toplantısında bildirib.
Onun sözlərinə görə, bu sektorun gəlirliliyinə ciddi təzyiq göstərə və aviabilet qiymətlərinin artmasına səbəb ola bilər.
Uelş bildirib ki, reaktiv yanacağın qiymətində illik 70 faizlik artım nəticəsində qlobal aviaşirkətlərin xalis mənfəəti 2026-cı ilə qədər demək olar ki, iki dəfə azalaraq 45 milyard dollardan 23 milyard dollara enəcək.
Analitiklər hesab edirlər ki, aviasiya sektorunun perspektivləri son aylarda nəzərəçarpacaq dərəcədə pisləşib. 2026-cı ilə yüksək artım gözləntiləri ilə başlansa da, ilin ortalarına doğru nikbinlik zəifləyib. Bu fonda “Fitch Ratings” qlobal aviasiya sənayesi üzrə proqnozunu “daha pis” səviyyəsinə endirib.
Aviaşirkətlər yüksək yanacaq qiymətlərinin uzunmüddətli olacağını düşünür. “United Airlines” neftin bir barelinin qiymətinin 2027-ci ilin sonuna qədər 100 dollardan yuxarı qalacağını proqnozlaşdırır. Digər tərəfdən, “Air New Zealand” artan xərclərin 25-40 faizini tarif artımları hesabına kompensasiya edə bildiyini açıqlayıb.
Sektorda əlavə problem kimi təyyarə tədarükündəki gecikmələr göstərilir. Bu vəziyyət aviaşirkətləri köhnə və daha az yanacaq səmərəli təyyarələrdən istifadə etməyə məcbur edir ki, bu da texniki xidmət və yanacaq xərclərini artırır.