“Apple” şirkəti illik Ümumdünya Tərtibatçılar Konfransını (WWDC) keçirib və orada məhsullarına edilən yeniləmələri təqdim edib.
Yeniavaz.com xəbər verir ki, ən əsas məqamlardan biri “Apple Intelligence” tərəfindən dəstəklənən “Apple” şirkətinin səs köməkçisinin yeni versiyası olan “Siri AI” olub.
“Siri AI” istifadəçilərin suallarını cavablandıran və onlara gündəlik işlərdə kömək edən digər AI köməkçilərinə bənzəyəcək. Daha ifadəli səsə malik olacaq, istifadəçinin ekranında nəyin göstərildiyini tanıya biləcək və onların tətbiqləri ilə qarşılıqlı əlaqədə olacaq. Həmçinin, “ChatGPT” və ya “Gemini” çatbot tətbiqlərinə bənzər öz tətbiqi olacaq. Bu, mətn və ya səsli ünsiyyətə imkan verəcək və həmçinin istifadəçinin bütün cihazlarında söhbətləri saxlayacaq. “Siri AI” “iPhone”, “iPad”, “Apple Watch” və “Apple Vision Pro da daxil olmaqla müxtəlif “Apple” cihazlarında mövcud olacaq. Əvvəlcə yalnız ingilis dilini dəstəkləyəcək. Şirkət “Siri” süni intellektinin ümumi istifadəyə verilməsi üçün konkret bir tarix açıqlamayıb və yalnız 2026-cı ilin sonuna qədər baş tutacağını bildirib.
Bu ilki WWDC konfransı Tim Kukun “Apple” şirkətinin baş direktoru kimi son konfransıdır. 1 sentyabrdan etibarən bu vəzifəni “Apple” şirkətinin Aparat Təchizatı Mühəndisliyi üzrə baş vitse-prezidenti Con Ternus icra edəcək.
Tətbiqimizi yükləyə bilərsiniz
