Dünya çempionatı üçün Argentina yığmasının heyəti açıqlanıb

Argentina millisinin təcrübəli hücumçusu və kapitanı, 38 yaşlı Lionel Messi 2026-cı il dünya çempionatında komandasına dəstək verəcək.
Yeniavaz.com xəbər verir ki, bu barədə Argentina Futbol Federasiyasının mətbuat xidməti sosial şəbəkədə paylaşım edib.
2026-cı il dünya çempionatı üçün Argentina yığmasının heyəti açıqlanıb. Siyahıda qapıçılar Emiliano Martines, Xuan Musso və Xeronimo Rulyi yer alıb. Müdafiə xəttində Nauel Molina, Qonsalo Montyel, Kristian Romero, Leonardo Balerdi, Lisandro Martines, Nikolas Otamendi, Nikolas Talyafiko və Fakundo Medina yer alıblar.
Yarımmüdafiədə Leandro Paredes, Covani Lo Çelso, Rodriqo De Paul, Tyaqo Almada, Eksekiel Palasos, Nikolas Qonsales, Niko Pas, Aleksis MakAllister, Enso Fernandes və Valentin Barko çıxış edəcəklər.
Hücum xəttində isə Xulian Alvares, Lionel Messi, Lautaro Martines, Xose Manuel Lopes və Culiano Simeone yer alıblar.
Qeyd edək ki, Argentina hazırda dünya çempionu statusunu daşıyır. Lionel Messi karyerasında altıncı dəfə dünya çempionatında forma geyinəcək. Ulduz futbolçu daha əvvəl 2006, 2010, 2014, 2018 və 2022-ci illərdə keçirilən mundiallarda iştirak edib.