Fransada immiqrasiyaya üç illik moratorium tətbiq edilməsi müzakirə olunur.
Yeniavaz.com xəbər verir ki, bu barədə ölkənin ədliyyə naziri Jerald Darmanen “Le Journal du Dimanche” qəzetinə verdiyi müsahibədə danışıb.
Nazir bildirib ki, Fransa əcnəbilərin inteqrasiyası və assimilyasiya qabiliyyətinin həddini keçib. Darmanen hesab edir ki, immiqrasiya axını əhəmiyyətli dərəcədə azaldılmalıdır. O, həmçinin iş yolu ilə yaşayış icazəsi alanların qohumlarına birləşməsi üçün yaşayış icazələrinin verilməsinin dayandırılmasını və hakimiyyət orqanlarına məhdudlaşdırıcı kvotalar tətbiq etməyə və müraciət edənlərin sayını, onların mənşəyini və ixtisaslarını müzakirə etməyə imkan vermək üçün Fransa konstitusiyasında islahatların aparılmasını təklif edib.
Nazir qeyd edib ki, ucuz xarici işçi qüvvəsini istismar edən “yoxsul kapitalizmin təşviqinin” qarşısının alınması vacibdir.
Xatırladaq ki, Fransa Daxili İşlər Nazirliyinin məlumatına görə, 2025-ci ildə ölkə hakimiyyəti son illərdə rekord həddə - 4,5 milyon yaşayış icazəsi verib. Bu, 2024-cü illə müqayisədə 3,2% artımdır. Üstəlik, hər üçüncü yaşayış icazəsi ailə birləşməsi əsasında verilib.
Tətbiqimizi yükləyə bilərsiniz
