2026-cı ilin ən çox qazanan idmançıları açıqlandı – Siyahı

“Forbes” nəşri 2026-cı il üzrə dünyanın ən çox qazanan idmançılarının reytinqini açıqlayıb.
Yeniavaz.com xəbər verir ki, planetin ən yüksək gəlir əldə edən 50 idmançısı son 12 ay ərzində ümumilikdə 4,1 milyard dollar qazanıb. Bu göstərici əvvəlki ildə qeydə alınan 4,2 milyard dollarla müqayisədə təxminən 3 faiz az olsa da, idman tarixində ikinci ən yüksək ümumi gəlir göstəricisi hesab olunur.
Nəşrin məlumatına görə, gəlirlərin nisbətən azalması əsasən Amerika futbolunda – xüsusilə NFL-də yeni meqa müqavilələrin sayının azalması ilə əlaqələndirilir.
Reytinqə ardıcıl dördüncü dəfə Kriştiano Ronaldo başçılıq edir. Portuqaliya millisinin kapitanı son bir ildə ümumilikdə 300 milyon dollar qazanıb. Bunun 235 milyon dolları meydandakı fəaliyyətdən, 65 milyon dolları isə reklam müqavilələri və biznes layihələrindən əldə olunub.
İkinci pillədə 170 milyon dollar gəlirlə Kanelo Alvares qərarlaşıb. Üçüncü yerdə isə 140 milyon dollar qazanan argentinalı futbolçu Lionel Messi yer alıb.
Siyahıda basketbolçuların üstünlüyü diqqət çəkir. İlk 50-liyə ümumilikdə 20 NBA oyunçusu daxil olub ki, bu da ötən illə müqayisədə dörd nəfər çoxdur. “Forbes” NBA-da maaş limitinin yüksəlməsinin yaxın illərdə basketbolçuların gəlirlərini daha da artıracağını proqnozlaşdırır.
2026-cı ilin reytinqində yer alan idmançılar 18 ölkəni və səkkiz fərqli idman növünü təmsil edir.
2026-cı ilin ən çox qazanan 10 idmançısı isə bunlar olub:
Kriştiano Ronaldo (futbol, Portuqaliya) – 300 milyon dollar
Kanelo Alvares (boks, Meksika) – 170 milyon dollar
Lionel Messi (futbol, Argentina) – 140 milyon dollar
LeBron Ceyms (basketbol, ABŞ) – 137,8 milyon dollar
Şohei Otani (beysbol, Yaponiya) – 127,6 milyon dollar
Stiven Karri (basketbol, ABŞ) – 124,7 milyon dollar
Con Ram (qolf, İspaniya) – 107 milyon dollar
Kərim Benzema (futbol, Fransa) – 104 milyon dollar
Kevin Durant (basketbol, ABŞ) – 103,8 milyon dollar
Luis Hamilton (avtomobil yarışları, Böyük Britaniya) – 100 milyon dollar
Reytinq göstərir ki, idman dünyasında gəlirlərin əsas hissəsi artıq yalnız meydandakı çıxışlardan deyil, reklam müqavilələri, investisiyalar və şəxsi brendləşmədən formalaşır. Xüsusilə Şohei Otani bunun diqqətçəkən nümunəsidir: onun 127,6 milyon dollarlıq gəlirinin yalnız 2,6 milyon dolları birbaşa idman fəaliyyətindən əldə edilib, qalan hissə isə sponsorluq və reklam gəlirlərindən formalaşıb.