“Otağa niyə girdiyinizi unudursunuz?” – Səbəbi məlum olub

Alimlər insanların tez-tez yaşadığı müvəqqəti unutqanlığın səbəbini araşdırıblar. 
Yeniavaz.com xəbər verir ki, araşdırma “Nature” jurnalında dərc olunub.
Mütəxəssislər bildirirlər ki, bəzən bir otağa niyə girdiyini unutmaq, hansısa adı xatırlamamaq və ya dilinin ucunda olan sözü yada sala bilməmək normal hal ola bilər. Bu zaman yaddaş silinmir. Beyin sadəcə məlumatı qısa müddətə “bloklayır”.
Araşdırma meyvə milçəkləri üzərində aparılıb. Təcrübədə narahatlıq yaradan qoxulardan istifadə olunub. Daha sonra mavi işıq və hava axını kimi təsirlərin milçəklərin yaddaşını müvəqqəti zəiflədə bildiyi müşahidə edilib. Təsir güclü olduqda unutqanlıq daha uzun çəkib.
Alimlər müəyyən ediblər ki, bu proses beyində dopamin adlı maddə ilə bağlıdır. Xüsusi neyronlar yaddaşın qısa müddətə bloklanmasına səbəb olur. Amma bu, uzunmüddətli yaddaşı silmir və əsas xatirələrə zərər vermir.
Tədqiqat müəlliflərinə görə, beyin bəzi məlumatları arxa plana keçirməklə insanın daha vacib şeylərə diqqət etməsinə kömək edir. Onlar fikirincə, unutqanlıq hər zaman yaddaş zəifliyi və ya beyin problemi demək deyil, əksinə, beynin məlumatları idarə etmək üçün istifadə etdiyi vacib mexanizmlərdən biridir.