Prokurorlar Fransanın keçmiş prezidenti Nikola Sarkozi üçün 7 il həbs cəzası tələb edib.
Yeniavaz.com xəbər verir ki, bu barədə BFM telekanalı məlumat yayıb.
Məlumata görə, tələb Paris Apellyasiya Məhkəməsində davam edən 2007-ci il seçki kampaniyasının Liviya tərəfindən maliyyələşdirilməsi işi üzrə irəli sürülüb.
Prokurorlar həmçinin Sarkozi üçün 300 000 avro cərimə və beş illik dövlət vəzifəsi tutmaq qadağası tələb ediblər.
Sarkozi seçki kampaniyası zamanı Liviyadan qanunsuz maliyyə vəsaiti almaqda ittiham olunur. Ancaq o, Liviyanın seçkiləri maliyyələşdirilməsindəki iştirakını rədd edir.
Digər tərəfdən, “La Depeche” nəşri qeyd edir ki, əgər apellyasiya məhkəməsi keçmiş prezidenti 30 noyabrda məhkum etsə, o, qərardan Kassasiya Məhkəməsinə apelyasiya şikayəti vermək hüququnu özündə saxlayacaq.
Qeyd edək ki, 2007-ci ildən 2012-ci ilə qədər davam edən prezidentlik müddətindən sonra Sarkozi bir sıra ittihamlarla üzləşib. Keçən il o, müasir Fransa tarixində həbs edilən ilk prezident olub.
Sentyabrın sonunda Paris məhkəməsi Nikola Sarkozini 2007-ci il seçki kampaniyasının Liviya hökuməti tərəfindən qanunsuz maliyyələşdirilməsinə görə məhkum edib.
Müstəntiqlər hesab edirlər ki, Liviya Fransada kampaniya maliyyələşdirilməsi üçün icazə verilən limitləri əhəmiyyətli dərəcədə aşaraq Sarkozi və ətrafına 50 milyon avroya qədər pul köçürüb.
Prokurorluğun məlumatına görə, pul Sarkozinin o vaxtkı Liviya lideri Müəmmar Qəddafinin beynəlxalq imicini yaxşılaşdırmaq və Liviyanın diplomatik təcriddən çıxmasına kömək etmək vədi müqabilində köçürülüb.
21 oktyabrda Sarkozi faktiki olaraq həbsxanaya salınıb. Məhkəmə həmçinin 100 000 avro cərimə və beş illik dövlət vəzifəsi tutmaq qadağası tətbiq edib. Lakin 10 noyabrda apellyasiya məhkəməsi müdafiə tərəfinin vəsatətini təmin edib və siyasətçini girov müqabilində azadlığa buraxıb. Keçmiş prezident daha sonra həbsxanada keçirdiyi 20 gün haqqında kitab yazdığını elan edib.
Sarkozi 2018-ci ildə rüşvətxorluq, qanunsuz seçki kampaniyasının maliyyələşdirilməsi və Liviya dövlət vəsaitlərinin gizlədilməsi ilə bağlı ittihamlarla üzləşib. O, iddiaları daim yalan adlandırıb.
Fransada keçmiş prezidentə qarşı bir neçə başqa iş də qaldırılıb. 2021-ci ildə məhkəmə Sarkozinin 2012-ci ildəki uğursuz yenidən seçilmə kampaniyasına “Bygmalion PR” şirkətindən istifadə etməklə həddindən artıq xərclədiyini və sonra bunu gizlətməyə çalışdığını müəyyən edib. Sarkozi podratçıların sxemlərindən xəbərsiz olduğunu iddia edərək ittihamları rədd edib.
Elə həmin il məhkəmə onu Liviyanın maliyyələşdirilməsi ilə bağlı istintaq barədə məlumat əldə etmək üçün kassasiya hakiminə rüşvət verməyə cəhddə günahkar bilib. 2023-cü ildə Sarkozi bu işdə həm apellyasiya, həm də kassasiya şikayətlərini uduzub. O, üç il həbs cəzasına məhkum edilib, bunlardan biri elektron nəzarət qolbağı altında həbsxana xaricində çəkilməli olan real müddət olub.
Tətbiqimizi yükləyə bilərsiniz
