“İran və ABŞ tezliklə bu məsələ ilə bağlı razılığa gələ bilərlər” − “Əl-Ərəbiyyə”

İran və ABŞ tezliklə Hörmüz boğazından kommersiya gəmilərinin təhlükəsiz keçidinin təmin edilməsi ilə bağlı razılığa gələ bilərlər.
Yeniavaz.com xəbər verir ki, bu barədə Səudiyyə Ərəbistanının “Əl-Ərəbiyyə” televiziya kanalı diplomatik mənbəyə istinadən məlumat yayıb. 
Kanal diplomatın sözlərinə istinadən bildirib ki, Hörmüz boğazından gəmilərin təhlükəsiz tranzitinin təmin edilməsi artıq yaxındır.
Mənbənin sözlərinə görə, Pakistanın vasitəçiliyi ilə keçirilən məsləhətləşmələrin iştirakçıları hazırda müharibəyə son qoymaq, Hörmüz boğazını açmaq və ABŞ-nin İslam Respublikasına qarşı blokadasını yüngülləşdirmək üçün anlaşma memorandumuna diqqət yetirirlər. İranın son təklifə cavabını cümə günü təqdim etməsi gözlənilir.
Lakin “Əl-Ərəbiyyə” mənbəsi vurğulayıb ki, danışıqlar prosesi çətindir və maneələr hələ də mövcuddur. O əlavə edib ki, İranın nüvə proqramı və Hörmüz boğazının tam açılması parametrləri ilə bağlı daha geniş məsələlərin yekun həlli əlavə danışıqlar raundları tələb edə bilər.