İran Yaxın Şərqdə ən azı 228 ABŞ hərbi obyektinə zərər vurub – WP

İran Yaxın Şərqdə ən azı 228 ABŞ hərbi obyektinə zərər vurub və ya onu məhv edib, lakin Amerika hakimiyyəti zərərin həqiqi miqyasını açıq şəkildə etiraf etmir.
Yeniavaz.com xəbər verir ki, bu barədə peyk görüntülərini təhlil edən “The Washington Post” (WP) qəzeti məlumat yayıb.
Qəzetin məlumatına görə, İranın hava hücumları anqarlara, kazarmalara, yanacaq saxlama məntəqələrinə, radarlara, rabitə sistemlərinə və hava hücumundan müdafiə avadanlıqlarına zərbə endirib.
Hava hücumları təhlükəsi səbəbindən ABŞ bölgədəki bazalarını tam şəkildə istifadə edə bilmir. Qəzetin mənbələrinə görə, əməliyyatın əvvəlində personalın əksəriyyəti İran raketlərinin hədəfə çata bilməyəcəyi digər obyektlərə köçürülüb.
Qəzetə danışan ekspertlər hesab edirlər ki, ABŞ ordusu İranın zərbə sistemlərini hədəfə almaq qabiliyyətini lazımınca qiymətləndirməyib, müasir dronlardan müdafiə olunmaq üçün uyğunlaşa bilməyib və bir sıra bazaları lazımi səviyyədə qoruya bilməyib. Ekspertlərin fikrincə, buna baxmayaraq, İranın zərbələri ABŞ ordusunun bombardman missiyaları aparmaq qabiliyyətinə əhəmiyyətli dərəcədə təsir göstərməyib.
Qəzet araşdırması üçün İran tərəfindən yayımlanan peyk görüntülərindən istifadə edib. Qəzet qeyd edir ki, görüntülərdə heç bir redaktə əlaməti aşkar etməyib. WP qeyd edir ki, Amerika peyk görüntü şirkətləri “Vantor” və “Planet” ABŞ hökumətinin tələbi ilə ABŞ-nin İrandakı əməliyyatı zamanı çəkilmiş görüntülərə girişi məhdudlaşdırıb.