Prezident Donald Tramp administrasiyasının yüksək vəzifəli rəsmisi cümə axşamı bildirib ki, aprelin əvvəlində başlayan ABŞ-İran atəşkəsi Konqresin müharibə səlahiyyətləri ilə bağlı son tarixin yaxınlaşması baxımından iki tərəf arasındakı hərbi əməliyyatlara “son qoyub”.
Yeniavaz.com “Reuters”ə istinadla xəbər verir ki, Tramp hazırda İrana qarşı müharibəni dayandırmaq və ya onun uzadılması üçün Konqresə əsaslandırma təqdim etmək üçün son tarixlə üzləşib.
“Lakin böyük ehtimalla həmin tarix müharibənin gedişatını dəyişdirmədən keçəcək”, - nəşr yazır.
“1973-cü il Müharibə Səlahiyyətləri Qətnaməsi baxımından, 28 fevralda başlayan hərbi əməliyyatlar başa çatıb”, - deyə rəsmi şəxs administrasiyanın mövqeyini izah edərək bildirib.
Rəsmi əlavə edib ki, atəşkəs başladıqdan sonra ABŞ silahlı qüvvələri ilə İran arasında heç bir atışma baş verməyib.
“Analitiklər və Konqres əməkdaşları düşünürdülər ki, Tramp Konqresi 30 günlük uzadılma istədiyi barədə məlumatlandıracaq və ya son tarixi nəzərə almayacaq. Administrasiya isə atəşkəsin münaqişənin sona çatdığını göstərdiyini əsas gətirir”, - “Reuters” yazır.
Qeyd edək ki, 1973-cü ildə qəbul edilmiş qanuna görə, prezident hərbi əməliyyatları dayandırmadan, Konqresdən icazə almadan və ya silahlı qüvvələrin təhlükəsizliyi naminə “qaçılmaz hərbi zərurət” əsasını gətirərək 30 günlük uzadılma istəmədən əvvəl maksimum 60 gün hərbi əməliyyat apara bilər.
Tətbiqimizi yükləyə bilərsiniz
