ABŞ neftinin əsas alıcıları hansı ölkələr olub? – Siyahı

ABŞ-nin gündəlik neft ixracı təxminən 4 milyon barel təşkil edib ki, bu da əvvəlki illə müqayisədə 3% azalma deməkdir.
Yeniavaz.com ABŞ Enerji İnformasiya Administrasiyasının (EIA) açıqladığı son məlumatlara istinadən xəbər verir ki, ölkədə daxili neft hasilatı rekord səviyyəyə – gündəlik 13,6 milyon barelə çatsa da, ixracda son dörd ildə ilk dəfə eniş müşahidə olunub.
Bildirilir ki, 2025-ci ildə ABŞ xam neftinin ən böyük idxalçısı Niderland olub. Bu ölkə il ərzində təxminən 419 milyon barel neft alaraq ümumi ixracın 10,7%-ni təşkil edib. Bu həcmin böyük hissəsi Avropanın əsas enerji qovşaqlarından biri sayılan Rotterdam limanı vasitəsilə emal və yenidən paylanma üçün istifadə olunur.
Şimali Amerika ölkələri də ABŞ neftinə yüksək tələbat göstərməkdə davam edir. Meksika (398 milyon barel) və Kanada (324 milyon barel) ən böyük idxalçılar sırasında yer alıb. Bununla yanaşı, Cənubi Koreya, Yaponiya, Çin və Hindistan kimi Asiya ölkələri də əsas alıcılar olaraq qalır.
2025-ci ildə ABŞ neftinin əsas idxalçıları aşağıdakı kimi olub:
Niderland – 418.75 milyon barel;
Meksika – 398.14 milyon barel;
Kanada – 323.65 milyon barel;
Cənubi Koreya – 257.35 milyon barel;
Yaponiya – 247.19 milyon barel;
Çin – 237.78 milyon barel;
Hindistan – 221.06 milyon barel;
Braziliya – 132.59 milyon barel;
Böyük Britaniya – 123.73 milyon barel;
İspaniya – 95.11 milyon barel.

Onu da bildirək ki, 2023-cü ildən etibarən Avropa ABŞ neftinin əsas bazarına çevrilib. Bu, əsasən Rusiyadan enerji asılılığını azaltmaq strategiyası ilə əlaqələndirilib. Lakin 2025-ci ildə Avropaya ixrac təxminən 7% azalıb. Ekspertlər bunu OPEC ölkələrinin hasilatı artıraraq bazarda rəqabəti gücləndirməsi ilə izah edir.
Avropa daxilində isə fərqli tendensiyalar müşahidə olunub. Böyük Britaniya ABŞ neft idxalını təxminən 35% azaldaraq ən kəskin geriləməni göstərib. Əksinə, Niderland idxalı artıraraq ümumi azalmanı qismən kompensasiya edib.
Asiya bazarında da dəyişikliklər diqqət çəkir. Çin və Sinqapura ixrac azalıb. Bunun əsas səbəbi ticarət gərginlikləri və Rusiya ilə İranın daha ucuz neft təklif etməsi göstərilir. Digər tərəfdən, Hindistan və Yaponiya ABŞ neftinə tələbatı artıraraq regional balansda dəyişiklik yaradıb.
Bütün bu azalmalara baxmayaraq, ABŞ neft ixracı hələ də yüksək səviyyədə qalır. 2015-ci ildə ixrac qadağasının ləğvindən sonra ölkənin neft daşımaları sürətlə artaraq 2011-ci illə müqayisədə təxminən 85 dəfə yüksəlib.

Elnur Əli