Valideynləri həbsdə olan gənclərin fiziki və psixi sağlamlıq problemləri daha çoxdur.
Yeniavaz.com xəbər verir ki, bu barədə “Sciencedaily” jurnalında dərc edilən araşdırmada qeyd olunub.
Tədqiqat çərçivəsində 2009–2020-ci illər arasında ABŞ-də uşaq xəstəxanasının məlumatları əsasında 1,7 milyondan çox tibbi qeyd təhlil edilib. Bu qeydlərin 2,2 faizini valideyni həbsdə olan və ya hüquqi məsuliyyətə cəlb edilən uşaqlar təşkil edir.
Araşdırmaya əsasən, bu qrup sağlamlıq problemləri baxımından qeyri-mütənasib şəkildə yüksək göstəricilərə malikdir. Belə ki, psixi sağlamlıqla bağlı xəstəxanaya yerləşdirmələrin 63,3 faizi, xəstəxanada qalma günlərinin 23,7 faizi və himayə sistemi ilə bağlı müraciətlərin 45,5 faizi məhz bu uşaqların payına düşür.
Tədqiqat həmçinin göstərir ki, bu kateqoriyaya aid uşaqlarda müxtəlif xəstəliklərin yayılma səviyyəsi digər uşaqlarla müqayisədə 1,5–16,2 dəfə daha yüksəkdir. Hər 100 uşaq üzrə əlavə olaraq 428 fiziki, 269 psixi sağlamlıq diaqnozu qeydə alınıb.
Eyni zamanda bu uşaqlar ümumi statistika daxilində bir sıra ağır xəstəliklər üzrə də yüksək paya malikdir. Onların arasında psixotik pozuntuların 42,9 faizi, bipolyar pozuntuların 42,1 faizi, intihar və özünə zərər halları ilə bağlı diaqnozların 38,3 faizi məhz bu qrupa aiddir.
Qeyd edək ki, ABŞ-də gənclərin təxminən 7%-nin valideynlərindən biri həbsdə olub.
Tətbiqimizi yükləyə bilərsiniz
