
Britaniya hakimiyyəti Kraliça II Elizabetin Londonun mərkəzində ucaldılacaq abidəsinin dizaynının təfərrüatlarını açıqlayıb.
Yeniavaz.com xəbər verir ki, bu, dörd metrlik postament üzərində quraşdırılmış üç metrlik bürünc heykəl olacaq.
Heykəlin obrazı 1955-ci ildə çəkilmiş, gənc Kraliçanın Qarter Ordeninin xalatını geyinmiş portretinə əsaslanır.
Heykəl, Sent Ceyms Parkındakı memorial kompleksinin yanındakı Mell küçəsində yerləşdiriləcək. Onun arxasında hərbi-dəniz formasında əri Şahzadə Filipin heykəli ucaldılacaq.
Abidənin layihəsi “Foster + Partners” memarlıq firması tərəfindən hazırlanır. Kompleksin 2028-ci ilə qədər tamamlanması gözlənilir.
Hakimiyyət orqanları həmçinin arxivləri, media materiallarını və müasirlərinin kraliça ilə bağlı xatirələrini özündə cəmləşdirən rəqəmsal bir memorial abidəsi yaratmağı planlaşdırır.
Qeyd edək ki, II Elizabet 8 sentyabr 2022-ci ildə 96 yaşında vəfat edib. O, 70 ildən çox hakimiyyətdə olub və onun yerinə III Çarlz gəlib.
Tətbiqimizi yükləyə bilərsiniz