Fələstin HƏMAS hərəkatı Qəzza zolağında hakimiyyətin tam şəkildə təhvil verilməsi üçün bütün hazırlıqları başa çatdırıb.
Yeniavaz.com xəbər verir ki, bu barədə “New York Times” qəzeti hərəkatın siyasi rəhbərliyindəki iki məmura istinadla məlumat verib.
Onların sözlərinə görə, HƏMAS tərksilah olmağa da hazırdır, ancaq yeganə maneə birbaşa Qəzzada yeni administrasiyanın olmamasıdır. Hazırda o, Qahirədən fəaliyyət göstərir.
Qəzzanı idarə etmək üçün texnokratik komitə 14 yanvarda yaradılıb, lakin üzvləri hələ də Misir paytaxtında yerləşir.
Mənbələr əlavə edib ki, HƏMAS yeni administrasiyada iştirakda təkid etmir, lakin müstəqil Fələstin dövləti qurulana qədər Fələstinin siyasi həyatında iştirak etməyə və İsrailə müqavimət göstərməyə davam etmək niyyətindədir. Hakimiyyətin təhvil verilməsinə qədər hərəkat daxilində bütün yeni təyinatlar və vəzifə yüksəlişləri dayandırılıb.
Tərksilah məsələsinə gəldikdə, HƏMAS polisə və digər təhlükəsizlik qüvvələrinə məxsus minlərlə kiçik silahı təhvil verməyə hazırdır. Lakin hərbi qanadın tərksilah edilməsi ilə bağlı suala rəsmilər qeyri-müəyyən cavab veriblər.
Qeyd edək ki, mart ayının sonunda “Reuters” agentliyi Sülh Şurasının HƏMAS-a regionda səkkiz aylıq tərksilah planı təqdim etdiyini və bu plana yeraltı tunel şəbəkəsinin məhv edilməsinin də daxil olduğunu bildirib.
Tətbiqimizi yükləyə bilərsiniz
