“Yuventus” Spalletti ilə müqaviləni uzatdı

İtaliyanın “Yuventus” futbol klubu baş məşqçi Luçano Spalletti ilə müqaviləni uzadıb.
Yeniavaz.com xəbər verir ki, bu barədə klubun mətbuat xidməti məlumat yayıb.
Məlumata görə, mütəxəssisin yeni müqaviləsi 30 iyun 2028-ci ilə qədərdir. Spalletti 2025-ci ilin oktyabrında "Yuventus"a rəhbərlik etməyə başlayıb.
66 yaşlı Spalletti, “Yuventus”la müqavilə imzalamadan əvvəl ən son İtaliya millisinə rəhbərlik edib. O, komandanı 2023-cü ilin avqustunda təhvil alıb və 2024-cü il Avropa Çempionatına vəsiqə qazandırıb. İtalyanlar 1/8 finala qədər yüksəliblər və həmin mərhələdə İsveçrəyə 2-0 hesabı ilə uduzaraq  titullarını qoruya bilməyiblər.
Spalletti, 2026-cı il Dünya Kubokunun seçmə mərhələsində Norveç (0:3) və Moldova (2:0) ilə oyunlardan sonra iyun ayında İtaliya millisindən ayrılıb.
Qeyd edək ki, Spalletti əvvəllər “Napoli”yə rəhbərlik edib və onları 2022/23 mövsümündə İtaliya çempionluğuna aparıb. Komanda 33 ildən sonra ilk dəfə milli çempionluğu qazanıb. Spalletti əvvəllər İtaliyanın “Empoli”, “Sampdoriya”, "Venesiya”, ​​“Udinese”, “Ankona”, “İnter” və “Roma” klublarına da rəhbərlik edib. Təcrübəli məşqçi onlarla birlikdə iki İtaliya Kubokunu və bir İtaliya Super Kubokunu qazanıb. 2009-cu ildən 2014-cü ilə qədər italyan mütəxəssis Sankt-Peterburqun “Zenit” komandasının baş məşqçisi olub və orada iki Rusiya çempionluğunu, bir Rusiya Kubokunu və bir Rusiya Super Kubokunu qazanıb.