ABŞ və İran arasında Pakistanın paytaxtı İslamabadda danışıqlar şənbə günü başlayacaq və bir neçə gün davam edəcəyi gözlənilir.
Yeniavaz.com xəbər verir ki, bu barədə məlumatlı mənbə TASS agentliyinə bildirib.
Mənbənin məlumatına görə, görüş qapalı keçiriləcək. O, ən çox ehtimal olunan məkan kimi “Serena” otelini göstərib.
Onun sözlərinə görə, otel ABŞ və İran nümayəndə heyətlərini qəbul etməyə hazırlaşır.
Məsləhətləşmələrdən sonra mətbuat konfransı gözlənilir.
Digər tərəfdən, qarşıdan gələn danışıqlarla əlaqədar olaraq İslamabadda təhlükəsizlik tədbirləri gücləndirilib. Hakimiyyət orqanlarının məlumatına görə, bu tədbirlər xarici nümayəndə heyətlərinin təhlükəsizliyini təmin etmək üçün nəzərdə tutulub. Hökumət binası kompleksinin və ətraf ərazilərin yerləşdiyi qırmızı zona xüsusi nəqliyyat vasitələri istisna olmaqla, bütün nəqliyyat vasitələri üçün bağlanıb.
Həmçinin, danışıqlarla əlaqədar 9 və 10 aprel tarixlərində paytaxtda rəsmi tətil elan edilib. Şəhər administrasiyasının bildirişinə əsasən, hüquq-mühafizə orqanları, tibb müəssisələri və kommunal xidmətlər adi qaydada fəaliyyət göstərməyə davam edəcək. İslamabad sakinlərinə cədvəllərini buna uyğun olaraq planlaşdırmaları tövsiyə olunur.
Qeyd edək ki, aprelin 7-də ABŞ Prezidenti Donald Tramp İranla iki həftəlik qarşılıqlı atəşkəs elan edib. O, iki tərəfin demək olar ki, bütün mübahisəli məsələləri həll etdiyini və Vaşinqtonun Tehranın 10 maddəlik təkliflərini gələcək danışıqlar üçün işçi əsas kimi gördüyünü bildirib. ABŞ lideri qərarın İranın Hörmüz boğazını açmaq istəyinə əsasən verildiyini bildirib. Tehran da öz növbəsində İrana hücum edilmədiyi təqdirdə müdafiə hücumlarını dayandırmağa razı olub. İki tərəf arasında vasitəçi olan Pakistanın Baş naziri Şahbaz Şərif onları 10 apreldə danışıqlara dəvət edib. İran dövlət televiziyasının məlumatına görə, danışıqların birbaşa olacağı gözlənilir.
Tətbiqimizi yükləyə bilərsiniz
