İran ABŞ və İsrailə 10 maddəlik plan təqdim etdi – NYT

İran ABŞ və İsrailə müharibəyə son qoymaq üçün 10 maddəlik təklif təqdim edib.
Yeniavaz.com xəbər verir ki, bu barədə “The New York Times” qəzeti məlumat yayıb.
Məlumata görə, plan danışıqlarda vasitəçilik edən Pakistan vasitəsilə təqdim edilib.
Təklifin bütün 10 bəndi məlum deyil, lakin iki yüksək vəzifəli İran rəsmisinin sözlərinə görə, İran bir daha hücuma məruz qalmayacağına dair zəmanət verilməsini, bütün sanksiyaların ləğv edilməsini və İsrailin Livanda “Hizbullah”a qarşı hücumlarına son qoyulmasını tələb edir.
Bunun müqabilində İran Hörmüz boğazının blokadasına son qoyacaq və hər gəmiyə 2 milyon dollarlıq vergi tətbiq edəcək ki, bunu da qarşı sahildə yerləşən Omanla bölüşəcək.
Plana əsasən, İran əldə etdiyi gəlirdən öz payını ABŞ və İsrail hücumları nəticəsində dağıdılmış infrastrukturun bərpasına sərf edəcək.
Bu yanaşma birbaşa kompensasiya tələb etmək əvəzinə təklif olunur.
İranın dövlət mediası bildirir ki, İranın təklifinin mətni atəşkəs rejimini rədd edir və İranın tələblərinə uyğun olaraq, müharibənin qəti şəkildə dayandırılmasını tələb edir.