Pakistan İran və ABŞ-yə hərbi əməliyyatların dayandırılması üçün plan təqdim edib.
Yeniavaz.com xəbər verir ki, bu barədə Reuters agentliyi mənbəyə istinadən məlumat yayıb.
Agentliyin məlumatına görə, sənəd iki mərhələli yanaşmanı nəzərdə tutur: dərhal atəşkəs, ardınca isə hərtərəfli razılaşma.
Atəşkəsin Hörmüz boğazından gəmilərin daşınmasının dərhal bərpasına imkan verəcəyi gözlənilir. Yekun razılaşma 15-20 gün ərzində əldə edilə bilər.
Agentlik yazır ki, sanksiyaların yüngülləşdirilməsi və xarici aktivlərinin dondurulmasının ləğvi müqabilində Tehranın nüvə proqramına məhdudiyyətlərin daxil ediləcəyi gözlənilir.
Mənbə qeyd edib ki, ilkin razılaşmalar Pakistanın vasitəçiliyi ilə tərəflər arasında əsas ünsiyyət kanalı kimi xidmət edən memorandum şəklində rəsmiləşdirilə bilər. Onun sözlərinə görə, bütün müddəalar 6 aprelə qədər razılaşdırıla bilər.
Agentliyin məlumatına görə, ABŞ və İran rəsmiləri hələlik heç bir rəsmi açıqlama verməyib.
Tətbiqimizi yükləyə bilərsiniz
