Qattuzo İtaliya millisindən istefa verdi

Cenaro Qattuzo İtaliya milli futbol komandasının baş məşqçisi vəzifəsindən istefa verib.
Yeniavaz.com xəbər verir ki, bu barədə İtaliya Futbol Federasiyasının (FIGC) mətbuat xidməti məlumat yayıb.
Məlumata görə, tərəflər qarşılıqlı olaraq müqaviləni ləğv ediblər.
Qeyd edək ki, İtaliya millisi 31 martda 2026-cı il Dünya Kubokuna vəsiqə qazanmaq hüququ uğrunda pley-off mərhələsinin son oyununda Bosniya və Herseqovinaya məğlub olub (1:1, penaltilərdə 1:4). Nəticədə, İtaliya komandası ardıcıl üçüncü dəfə Dünya Kubokuna vəsiqə qazana bilməyib.
Qeyd edək ki, 48 yaşlı Qattuzo 2025-ci ilin iyun ayından bəri İtaliya milli komandasının məşqçisidir. O, əvvəllər İtaliyanın “Palermo”, “Piza”, “Milan", “Napoli”, İsveçrənin “Sion”, Yunanıstanın “OFİ”, İspaniyanın “Valensiya”, Fransanın “Marsel” və Xorvatiyanın “Hayduk Split” klublarına rəhbərlik edib. Onun rəhbərliyi altında “Napoli” 2020-ci ildə İtaliya Kubokunu qazanıb.