“Time” yenə Trampı üz qabığına çıxardı – “Çıxış haradadır?”

Amerikanın “Time” jurnalı aprel sayının üz qabığını dərc edib.
Yeniavaz.com xəbər verir ki, üz qabığında ABŞ Prezidenti Donald Tramp əlində İran xəritəsi və “Çıxış haradadır?” başlığı ilə təsvir olunub.
Məqalənin müəllifləri qeyd edirlər ki, İranla müharibə Trampı çətin bir seçim qarşısında qoyur: münaqişədən çıxış yolu tapmaq və özünün və partiyasının siyasi gələcəyini xilas etmək.
Müəlliflərin fikrincə prezident ən yaxın müşavirlərindən “həyəcan təbili çalan” xəbərlər alır. Məsələn, Ağ Evin aparat rəhbəri Suzi Uayls və bir qrup köməkçisi prezidentə müharibənin uzadılmasının onun ictimai dəstəyini və noyabr ayında keçiriləcək ara seçkilərdə respublikaçıların perspektivlərini təhdid etdiyini bildiriblər.
Öz növbəsində sosioloq Toni Fabritsio Amerikanın İrandakı əməliyyatının azalan populyarlığını göstərən sorğu məlumatlarını təqdim edib.
Administrasiyanın yüksək vəzifəli rəsmisi qeyd edib ki, İranın nüvə təhlükəsinin aradan qaldırılmasını ən böyük nailiyyətlərindən biri hesab edən Tramp İslam Respublikasının hərbi təlimlərdə uğurları barədə məlumat alıb.
Bununla belə, Uayls müşavirlərin prezidentə münaqişənin necə qəbul edildiyi barədə “ideal faktlar” təqdim etməsindən narahat olduğunu bildirib. Onun sözlərinə görə, Trampa əslində bilməli olduğu deyil, eşitmək istədiyi faktlar deyilib.
Məqalədə qeyd olunur ki, Ağ Ev vaxtın onların xeyrinə işləmədiyini və müharibənin uzanmasının prezident, onun partiyası və Amerika ictimaiyyəti üçün daha böyük itkilərə səbəb olacağını anlayır.
Müəlliflərin qeyd etdiyi kimi, müasir tarixin ən böyük neft böhranı qlobal artım proqnozlarının kəskin şəkildə azalmasına səbəb olub. Bu baxımdan, Hörmüz boğazının uzunmüddətli blokadası qlobal iqtisadiyyatı tənəzzülə sürükləyə bilər.
Məqalədə deyilir ki, iqtisadiyyatı dirçəltməyi və xarici münaqişələrdən qaçmağı vəd edən Tramp, heç bir mandat olmadan müharibəyə başlayıb və iqtisadi nəticələr, çox güman ki, hələ yeni özünü göstərməyə başlayır.
Eyni zamanda, prezidentin özü mövcud vəziyyətdən məyus olduğunu bildirir. Nəşrin fikrincə, artan siyasi və iqtisadi itkilər onu həll yolu axtarmağa məcbur edir. Baxmayaraq ki, o, hələ də əməliyyatın uğuruna ümid edir.