Yaxın Şərqə görə, 45 milyon insan aclıqla üzləşə bilər – BMT

Yaxın Şərqdəki gərginliklə əlaqədar yoxsul ölkələrə on minlərlə ton ərzaq yardımı dayandırılıb.
Yeniavaz.com xəbər verir ki, bu barədə “Financial Times” (FT) qəzeti məlumat yayıb.
Nəşrin məlumatına görə, BMT-nin Ümumdünya Ərzaq Proqramı (ÜƏP) fasilələr davam edərsə, milyonlarla insanın aclıqla üzləşə biləcəyi barədə xəbərdarlıq edib.
Ümumdünya Ərzaq Proqramının (ÜƏP) Təchizat Zənciri Direktoru Korin Fleyşerin sözlərinə görə, təxminən 70 000 ton ərzaq ehtiyatı logistika və marşrut problemləri ilə əlaqədar dənizdə qalıb. Təşkilat qeyd edib ki, problem iyun ayına qədər davam edərsə, dünyada kəskin qida təhlükəsizliyi ilə üzləşən insanların sayı 45 milyona çata bilər.
Təchizatdakı fasilələr, xüsusən də konservləşdirilmiş məhsullar da daxil olmaqla, təxminən 30 000 ton qablaşdırılmış qida təchizatına təsir göstərib.
Nəşrdə qeyd olunur ki, Hörmüz boğazının bağlanması və Qırmızı dənizdəki təhdidlər yükgöndərənləri Ümid burnu vasitəsilə Afrika ətrafında gəmilərin marşrutunu dəyişdirməyə məcbur edib və bu da çatdırılma müddətini və xərclərini əhəmiyyətli dərəcədə artırıb.
Xüsusilə, Yəmənə göndərilən təxminən 21 000 ton buğda Omanda hələ də qalıb. Konqo Demokratik Respublikasına göndərilən yüklər isə Tanzaniya limanlarında gecikir. Əhalinin üçdə birini aclıq təhlükəsi ilə üzləşdirən Əfqanıstanı təmin etmək üçün ÜƏP BƏƏ-dən Səudiyyə Ərəbistanı, İordaniya və Türkiyə də daxil olmaqla bir neçə ölkə vasitəsilə alternativ quru yolu marşrutundan istifadə etməyə başlayıb ki, bu da logistika və yanacaq xərclərinin kəskin artmasına səbəb olub.
Qeyd edək ki, fevralın 28-də ABŞ və İsrail İrana qarşı hərbi əməliyyata başlayıb. Tehran da daxil olmaqla, İranın böyük şəhərləri vurulub. İslam İnqilabı Keşikçiləri Korpusu (SEPAH) İsrailə hücum edərək genişmiqyaslı cavab əməliyyatı elan ediB. Bəhreyn, İordaniya, Qətər, Küveyt, BƏƏ və Səudiyyə Ərəbistanındakı hədəflərə də zərbələr endiriliB. Martın 2-də SEPAH general-mayoru İbrahim Cabari dünya neft ixracatının təxminən beşdə birinin keçdiyi Hörmüz boğazının İsrail və ABŞ-nin İrana qarşı hərbi əməliyyatı ilə əlaqədar gəmiçilik üçün bağlanacağını bildirib.