“Onları bombardmanlardan qoruya bilmərəm, amma eyni gündə ölə bilərik”

Türkiyənin Van əyalətində, İranla sərhəddə yerləşən Kapıköy keçid məntəqəsi iranlıların müharibədən zərər çəkmiş ölkələrini tərk edə biləcəyi keçid məntəqələrindən biridir.
Yeniavaz.com xəbər verir ki, “Reuters” agentliyi Kapıköy keçid məntəqəsindən reportaj hazırlayıb.
Agentliyin məlumatında bildirilir ki, son bir neçə gündə yüzlərlə insan sərhədi keçib, lakin hər iki istiqamətdə axın davam edir.
Bəziləri şəhərlərinə bomba düşdüyü üçün qaçır. Digərləri isə yaxınları ilə əlaqəni itirdikdən sonra oranı tərk etmək qərarına gəliblər. Xarici ölkələrdə yaşayan bəzi iranlılar isə əksinə, yaxınlarından məlumat almaq üçün İrana geri dönürlər.
İrana geri qayıdanlardan biri də 45 yaşlı Leyla adlı qadındır. Şiraz şəhərində yaşayan ailəsi ilə əlaqəsini itirdikdən sonra o, İstanbuldan evə qayıtmaq qərarına gəlib:
“Ailəm çətinlik çəkə biləcəyi halda özümü necə təhlükəsiz hiss edə bilərəm? Qardaşlarımdan biri ağır xəstədir və komadadır. Müharibənin sonuna qədər İranda qalmağı planlaşdırıram. Mən onları bombardmanlardan qoruya bilmərəm, bu doğrudur. Amma mən onlarla birlikdə ola bilərəm. Eyni gündə ölə bilərik, amma heç olmasa hamımız sağ ikən onlara kömək edə bilərəm”.