“Aİ-nin Ukraynaya yardımını əngəlləyən bir nəfərin ünvanını ordumuza verəcəyik” − Zelenski

Ukrayna Prezidenti Volodimir Zelenski Ukrayna ordusuna Avropanın Ukraynaya yardımını əngəlləyən “Avropa İttifaqından bir nəfərin” ünvanını verə biləcəyini bildirib.
Yeniavaz.com xəbər verir ki, bu barədə Zelenski jurnalistlərə danışıb.
Söhbətin Macarıstanın Baş naziri Viktor Orbandan getdiyi güman edilir.
“Ümid edirik ki, Avropa İttifaqından bir nəfər 90 milyardı və ya 90 milyardın ilk hissəsini əngəlləməyəcək və Ukrayna əsgərlərinin silahları olacaq. Əks təqdirdə, bu şəxsin ünvanını Silahlı Qüvvələrimizə verəcəyik - qoy ona zəng edib öz dillərində onunla ünsiyyət qursunlar. Bu pula alternativimiz olmadığını başa düşürük. Bu pulun bir nəfər tərəfindən bloklandığını başa düşürük. Rəsmi olaraq, burada heç bir sirr yoxdur”, - Ukrayna Prezidenti əlavə edib.
Qeyd edək ki, fevral ayında Macarıstan Avropa İttifaqının Ukraynaya 90 milyard avroluq kredit verməsinə qarşı çıxdı. Kredit bütün Aİ üzv dövlətləri tərəfindən təsdiqlənməli idi. Macarıstanın mövqeyi, həmçinin blokun müharibənin dördüncü ildönümü üçün hazırlanan Rusiyaya qarşı 20-ci sanksiyalar raundunu qəbul etməsinə mane oldu.