“İşimiz bitəndə hökumətinizi ələ keçirin” – Trampdan İran xalqına

ABŞ Prezidenti Donald Tramp ABŞ-nin İranda böyük hərbi əməliyyatlara başladığını elan edib.
Yeniavaz.com “Times of İsrael” qəzetinə istinadla xəbər verir ki, o, bu barədə “Truth Social” sosial şəbəkə hesabındakı video açıqlamasında bildirib.
Onun sözlərinə görə, əməliyyat İranın nüvə və raket proqramlarına qarşı yönəlib. Tramp əlavə edib ki, əməliyyatın məqsədi Tehranın nüvə silahı əldə etməsinin qarşısını almaqdır. Tramp həmçinin ABŞ-nin İranın raket sənayesini yerlə bir edəcəyini bildirib.
Tramp İranda davam edən hücumların məqsədinin rejimi devirmək olduğunu qeyd edib.
“Silahlarınızı yerə qoyun. Sizə ədalətli münasibət göstəriləcək və tam toxunulmazlıq təmin ediləcək, əks halda mütləq ölümlə üzləşəcəksiniz”, - Tramp qeyd edib.
O, İran xalqına da müraciət edib. 
“İranın böyük və qürurlu xalqına deyirəm ki, bu gecə azadlığınızın saatı yaxınlaşır. Sığınacaqda qalın. Evinizdən çıxmayın. Çöl çox təhlükəlidir. Hər yerə bombalar yağacaq”, - deyə o, davam edib.
Tramp İran xalqına fürsətdən istifadə etməyə və hökumətini ələ keçirməyə çağırıb.
"İşimiz bitəndə hökumətinizi ələ keçirin. Bu, yəqin ki, nəsillər boyu yeganə şansınız olacaq. Uzun illərdir ki, Amerikadan kömək istəyirsiniz, amma heç vaxt ala bilməmisiniz. Görək necə cavab verəcəksiniz. Amerika sizi böyük güc və dağıdıcı qüvvə ilə dəstəkləyir”, - Tramp qeyd edib.
“İndi taleyinizin nəzarətini ələ keçirməyin və əlinizin altında olan firavan və şərəfli gələcəyi açmağın vaxtıdır. Bu, hərəkətə keçməyin vaxtıdır. Bunun keçib getməsinə imkan verməyin”, - o əlavə edib.
Qeyd edək ki, bu gün səhər saatlarında İsrail və ABŞ İrana zərbələr endirib.